Parlamentshilerdiń G7/20 konferensııasyna 40-tan astam eldiń depýtattary men halyqaralyq uıymdardyń ókilderi jáne sarapshylary qatysty. Forým Kóshi-qon men genderlik teńdik máselesine arnaldy.
Konferensııa barysynda G.Isımbaeva «Kóshi-qon, qaýipsizdik» atty taqyrypta sóz sóıledi. Ol óz sózinde álemdegi kóshi-qon saıasatyn jetildirý, bosqyn áıelder men balalardyń quqyǵyn zańnamamen qamtamasyz etý máselelerin kóterdi. Parlamentshi sharaǵa qatysýshylardy Qazaqstandaǵy konstıtýsııalyq reformalar men olardyń eldegi demokratııany nyǵaıtý baǵytynda júrgizilip jatqan jumystarynan habardar etti.
Sonymen qatar, G.Isımbaeva Italııa Parlamenti Depýtattar palatasynyń Vıse-spıkeri R.Djakettımen jáne «Italııa-Qazaqstan» dostyq tobynyń múshelerimen júzdesti. Kezdesý barysynda taraptar Qazaqstan men Italııa arasyndaǵy ózara qarym-qatynastyń ózekti máseleleri boıynsha pikir almasty. Májilis Tóraǵasynyń orynbasary parlamentaralyq baılanystardy damytýdyń mańyzyna, zań shyǵarý isinde tájirıbe almasý máselesine jáne ózara yntymaqtastyq toptarynyń qyzmetin belsendi ete túsý joldaryna toqtaldy.
R.Djakettı óz kezeginde Qazaqstan men Italııa arasyndaǵy ekijaqty qatynastardyń strategııalyq seriktestik pen konstrýktıvti úndesý jolymen órkendeı beretinine senim bildirdi.
Italııalyq parlamentshiler Qazaqstandaǵy konstıtýsııalyq reformalar jaıynda bile túsýge múddelilik tanytty. Májilis Tóraǵasynyń orynbasary prezıdenttik basqarý formasyn saqtaı otyryp, bılik tarmaqtary arasynda ókilettilikterdi qaıta bólýdiń negizgi máseleleri jaıynda tolyq maǵlumat berdi.
Júzdesý sońynda G.Isımbaeva ıtalııalyq áriptesterin EKSPO-2017 halyqaralyq kórmesine shaqyrdy.
Sonymen qatar, Qazaqstan Respýblıkasy Parlamenti Májilisi Tóraǵasynyń orynbasary Gúlmıra Isımbaeva Azııa parlamentshileriniń halyqtyń qonystanýy men damýy jónindegi forýmy (HQDAPF) Atqarýshy komıtetiniń 82-shi otyrysyna qatysty, dep habarlady Parlament Májilisiniń baspasóz qyzmeti.