Kóshpeli otyrystyń moderatory, Parlament Májilisiniń depýtaty, «Indýstrııalyq damý» baǵyty boıynsha partııalyq kýrator Amanjan Jamalov bastaǵan komıssııa músheleri eń áýeli shahardaǵy iri kásiporyn «О́skemen tıtan-magnıı kombınatyn» aralap kórdi. Halyq qalaýlysy óndiris ornynyń jumysymen tanysý barysynda Memleket basshysynyń bıylǵy Joldaýynda sóz etilgen Qazaqstannyń Úshinshi jańǵyrýynyń naqty mysaldary kásiporynda kórinis taýyp otyrǵanyna kýá bolǵanyn aıtty.
«Zaýyt qansha jerden jańǵyrtylsa da, adam faktory bolmasa, damý múmkin emes. Bul másele kásiporynda utymdy uıymdastyrylǵan eken. Oǵan búgin kóz jetkizdik. «О́TMK» AQ álemdik standarttarǵa saı ónim shyǵarýda. Mundaǵy tıtan ónimin AQSh bastaǵan iri memleketter tutynýda. Ushaq óndirisinde, ǵarysh, munaı-gaz salasynda keńinen qoldanysqa ıe. Zaýyt álemde óndiriletin tıtannyń 11 paıyzyn qamtamasyz etedi. Sondyqtan munda qolǵa alynǵan iri jobalarǵa Elbasy únemi qoldaý kórsetip, kóńil bólip otyrady», − dedi Amanjan Jamalov.
Kóshpeli májilistiń ekinshi otyrysy oblystyq ákimdikte ótip, onda óńirdegi járdemge muqtaj, jumysy turalap turǵan kásiporyndardyń túıtkildi máselelerin sheshý joldary talqylandy. Isteri ilgeri baspaı júrgen kásiporyn basshylary ózderin tolǵandyrǵan máselelerin tilge tıek etti. «Azııa Avto Qazaqstan» AQ-tyń bas dırektory Erjan Mándıev qazirgi ýaqytta otandyq kólikterge el ishinde suranys tómendegenin aıtyp, máseleni sheshý úshin memleket tarapynan avtonesıelendirý baǵdarlamasy ázirlenip, avtomobıl ımportyna shekteý qoıylsa, ózge de qarjylaı kómekter kórsetilse degen ótinishin bildirdi. Makaron ónimin shyǵarýmen shuǵyldanatyn «Tamasha» JShS basshysy 2013 jyly qurylǵannan beri undy turaqtandyrý qorynan tómen baǵamen alyp kelgenin, qazir olardyń undy saýdaǵa shyǵarmaıtynyna toqtalyp, kásiporyndy ońaltýǵa sýbsıdııa surady.
Jıyn sońynda «Indýstrııalyq damý» baǵyty boıynsha óńirlik komıssııanyń múshesi Oksana Jelıakova oblystaǵy kásiporyndardy ońaltý boıynsha atqarylǵan jumystardy jipke tizgenimen, Májilis depýtaty qolǵa alynǵan sharalardy jetkiliksiz dep tanyp, atalǵan komıssııanyń jumysyn jandandyryp, komıssııa músheleriniń quramyn ózgertý qajettigin jetkizdi.
«О́z qýatynda jumys istemeı turǵan kásiporyndardy ońaltý qajet. Shyǵys Qazaqstan – el ekonomıkasynyń draıveri, munda irgeli óndiris oryndary shoǵyrlanǵan. Sondyqtan Shyǵystaǵy ónerkásip irkilmeýi tıis, ol úshin túrli memlekettik qoldaý sharalaryn qarastyrý kerek», – dedi Amanjan Jamalov.
Azamat QASYM,
«Egemen Qazaqstan»
О́SKEMEN
Sýretti túsirgen
Esimhan ORYNBAEV
