39 jasar Makronnyń úlken saıasatta tájirıbesi az. Tipti, joq dese de bolady. Ol basqaratyn júıege kúmánmen qaraýshylardyń alǵa tartatyny da sol. Birneshe jyl bank salasynda jumys istep, keıin eldiń ekonomıka, qarjy jáne ónerkásip mınıstrligin basqarǵan Makron óziniń «Alǵa!» atty partııasyn da ótken jyly ǵana qurǵan. Ońshyldar men solshyldar arasynda orta jol usynǵan jas partııa atynan qazirgi parlamentte birde-bir depýtattyń bolmaýy da jańa prezıdenttiń jumysyna aýyrtpalyq beredi, deıdi sarapshylar. Endi maýsymnyń 11-i men 18-ine josparlanǵan parlamenttik saılaýda «Alǵa!» partııasy alǵash ret óz ókilderin qospaq.
Ekinshiden, qazir, Eýroodaqtyń shańyraǵy shaıqala bastaǵan kezde, fransýzdardyń da saıası kózqarastary ekige jaryldy. Áleýmettik ishki saıası talastardy sanamaǵanda, odaqtan shyǵýdy qoldaýshylar qarasynyń kóbeıýi eldiń ekige jarylýyna ákelip soqty. Degenmen, bıliktiń bedeli tómendeı bastaǵan osy tusta prezıdenttikke orta joldy ustanǵan qaıratkerdiń kelýi eldiń saıası ómirine jańasha qarqyn beredi degen de joramal bar.
Bastysy, Makrondy eldiń saıası elıtasy qoldap otyr. Ásirese, Marın Le Penniń Eýroodaqtan shyǵý týraly saılaýaldy baǵdarlamasynan seskengen saıasatkerler Makronnyń aınalasyna birikken. Sarapshylar bul turǵyda Makrondy Breksıttiń «esten tandyrýynan» emdegen qaıratker retinde baǵalaýda. Sonymen qatar, Makronnyń eńbek naryǵynan bastap ekonomıkanyń birqatar sektorlarynda reforma jasaý týraly bergen ýádesinen qarapaıym halyq úmit kútip otyr.
Makronnyń jeńisinen keıin eýronyń dollarǵa shaqqandaǵy baǵamy 0,3% túsip ketti. Al osydan shamaly ýaqyt buryn ótken saılaýdyń birinshi týrynda eýro alty aılyq maksımýmǵa kóterilgen edi jáne eýronyń qaıta qunsyzdanýyn ınvestorlar naryqtyń bul jańalyqqa daıyn bolýymen túsindiredi. Ekinshiden, Makronnyń áleýmettik reformalary el ekonomıkasyna aıtarlyqtaı ózgeris ákeletindikten, bastapqy kezdegi qıynshylyqtar aıasynda valıýtanyń álsireýi de zańdy qubylys bolmaq.
Baýyrjan MUQANOV,
«Egemen Qazaqstan»
