«QR Mádenıet jáne aqparat mınıstrliginiń tapsyrysy boıynsha «Qazaqfılm» kınostýdııasy «Sataifilm» kompanııasymen birlesip, mamyrdyń 15-16-sy kúnderi Aqan Sataevtyń eń aýqymdy «Tumar» kórkem fılmine kastıng jarııalaıdy», - delingen rejısser Aqan Sataevtyń Instagramdaǵy paraqshasynda.
Atalǵan habarlamada kastıngtiń myna meken jaıda ótetindigin aıtylǵan: Astana qalasy, Ilııas Esenberlın kóshesi 10, «Jastar» teatry. Saǵat 9-00-den 18-00-ge deıin. Jas sanaty: 16-jasqa deıin, ultyna shekteý joq.
Aqan Sataev «Tumar» fılmin túsiretindigin osydan eki aıdan astam ýaqyt buryn QR Mádenıet jáne sport mınıstrliginiń keńeıtilgen otyrysynda málim etken bolatyn.
«Osy jyly biz Mádenıet mınıstrligimen birlesip «Tumar» tarıhı fılmin túsirýdi bastaǵaly otyrmyz. Sapaly dúnıe shyqqan jaǵdaıda ol otandyq kórermenniń de, sheteldik aýdıtorııanyń da qyzyǵýshylyǵyna ıe bola alatynyna senimdimin. Tumar patshaıym - álemdik tarıhtyń barysyna yqpal etken tulǵa. Kınoprokatymyzdyń geografııasyn keńeıtý úshin mundaı jobalardy jasaý kerek dep sanaımyn. Sebebi, bul eldiń halyqaralyq ımıdjiniń qalyptasýyna oń áser etedi», - degen edi rejısser.
Sonymen fılmniń túsirilim jumystary 2017 jyldyń qazan aıynda bastalyp, 2018 jyldyń aqpan aıyna deıin Qazaqstan aýmaǵynda júrgiziledi. Tarıhı jobanyń avtorlary: Álııa Nazarbaeva men Tımýr Jaqsylyqov.
Aıta keteıik, Saq patshaıymy Tumardyń esimi ejelgi jazbalarda Tomırıs dep kórsetilgen. B.z.d. 530-529 jyldary Mıdııa patshasy Kır kóptegen elderdi ózine baǵyndyryp, «Azııa ámirshisi» ataǵyna ıe bolyp, Uly dalaǵa qarsy joryqqa shyqty. Shaıqastardyń birinde Kır patshasy Tomırıstiń jubaıy Rústemdy óltirip, Tumardyń balasy Sypyrdy qolǵa túsirgen. Tutqynda Tomırıstiń uly da mert boldy. Al Kır kóshpendilerge elshi attandyryp, olardyń hanshasyna ózine turmysqa shyǵýyn talap etedi. Tumar Kır patshanyń usynysyn qabyldamaı, onyń basyn qanǵa tunshyqtyrýǵa ýáde etedi. Osydan keıin patshaıym parsylarǵa qarsy urys júrgizip, jeńiske jetedi. Sol kezde Tumar parsylardyń patshasy Kırdiń basyn shaýyp alyp, qan toltyrylǵan sabaǵa tyǵyp: «Ańsaǵanyń qan edi, ish endi sony!» - dep aıqaılady. Bul oqıǵany grek tarıhshysy Gerodot «eń keskilesken jáne uly shaıqas» dep sýrettegen.
