Dúbirli dodany úsh myńnan astam kórermen tamashalady. At báıgesinen bólek ulttyq sport túrlerinen jarystar ótip, júzden astam qatysýshy baqtaryn synady. Arnaıy jasaqtalǵan etno aýylda ulttyq qundylyqtar nasıhattaldy.
«Jeńistiń 72 jyldyǵyna arnalǵan sharany uıymdastyrýǵa aýdan turǵyndary belsendilik tanytty, jergilikti kásipkerler qoldaý kórsetti», deıdi aýdan ákimi Álımuhammed Quttymuratuly.
Alaman báıgeniń bas júldesi – «ÝAZ Patrıot» avtokóligi. Ony Aqtaýdan kelgen Baqdáýlet Meńdibaev jeńip aldy. Segizinshi synypta oqıtyn Baqdáýlet at jarysqa 11 jasynan beri qatysyp keledi.
«Bul tulparym Daýyl ekeýmiz alǵan altynshy kólik», deıdi ol. Báıgeniń ekinshi, úshinshi oryndaryn ıelengen shabandozdar da júldesiz qalmady. Olarǵa 700, 400 myń teńge kóleminde syıaqy berildi. Al kókpardan ótken jarysta Mahambet aýdanynyń komandasy top jaryp, 400 myń teńgege ıe boldy.
Baqytgúl BABASh,
«Egemen Qazaqstan»
