Bul aǵa býyn úshin jyly estelikter janyn jadyratqan júzdesý bolsa, jas býynǵa ótkenniń ónegesindeı taǵylymy mol kezdesýge aınalyp sala berdi.
Basylym basshysy Darhan Qydyráli gazettiń qos ardagerin ujym atynan quttyqtap, olardyń qazaq baspasózin damytýǵa qosqan úlesi zor ekenin, atqarǵan eńbekteri oqyrman tarapynan da, memleket tarapynan da baǵalanǵanyn atap ótti. Qaısar Álimniń Alash arystarynyń aty atalmaı turǵan kezeńinde asyldyń synyǵy Gúlnár Dýlatovamen birge qazaq kósemsóziniń negizin salýshylardyń biregeıi Mirjaqyptyń máıitin týǵan jerge alyp kelýge atsalysqanyn, jýrnalıst-jazýshy Ázilhan Nurshaıyqovpen uzaq jyldar boıy hat jazysqanyn, sol sııaqty Janat Elshibektiń de jazǵan ádebı-mádenı shyǵarmalary men ult baspasózinde tuńǵysh ret qurastyrǵan sózjumbaqtarymen búgingi býyn mektepten etene tanys ekenin jetkizdi. Al gazettiń burynǵy basshysy, Parlament Májilisiniń depýtaty Saýytbek Abdrahmanov abıtýrıent kezde sóz zergeri Ǵabeńdi kórgenin eske alyp, kóp uzamaı 70 jasqa tolǵan qazaq ádebıetiniń klassıgi Ǵ.Músirepovtiń mereıtoıy Almatydaǵy opera jáne balet teatrynda saltanatpen atalyp ótkenin, sol kezdegi Ǵabeńder tolǵan jas pen qazirgi jańa turpatty Qazaqstandaǵy 70 jastyń arasyndaǵy ólshem ózgergenin, búginde bul orta jasqa aınalǵanyn, sondyqtan qos qalamgerdiń áli de oqyrmanyna bereri mol ekenin aıtty.
Baspasóz ardageri Erjuman Smaıyl eki qalamgermen de «Lenınshil jas» gazeti tabystyrǵanyn, Q.Álimniń Qostanaıdaǵy menshikti tilshi retinde qalyń oqyrman iltıpatyna bólengenin, J.Elshibektiń jastaıynan jastar gazetiniń jańashyl maketshisi bolǵanyn atap ótti. Aǵa basylymdaǵy jyldardyń da alystap bara jatqanyn, áriptesterin áli kúnge deıin saǵynyp otyratynyn aıtty. Gazettiń taǵy bir ardageri Jumagúl Soltıeva bolsa, qos qalamgermen uzaq jyl birge eńbek etkenin, eki áriptesiniń de elge sińirgen eńbegi eren ekenin jetkizdi. «Lenınshil jas» gazetinde júrgenimizde bas redaktorymyz Seıdahmet Berdiqulov Qostanaı óńirinen tolassyz jazyp jatatyn Qaısardy «bizdiń myq shegemiz» dep atasa, Janatty «general», ıaǵnı, «qazaq maketiniń generaly» dep ataıtyn edi, dedi ol. Basqosýda sonymen birge gazet qyzmetkeri Qorǵanbek Amanjol áriptesterine arnalǵan jyr joldaryn oqyp berse, jas tilshi ári aıtysker aqyn Raýan Qaıdar arnaý aıtyp, bir serpiltip tastady.
О́z kezeginde mereıtoı ıeleri zor qurmet kórsetken tól redaksııalarynyń ujymyna rızashylyqtaryn bildirip, marqaıǵan kóńilmen ǵumyrlarynyń altyn arqaýyna aınalǵan gazettegi jyldary týraly áńgime órbitti.
– Sol kezde Torǵaı oblysy qaıtadan ashyldy da, osy óńirdegi menshikti tilshi retinde 43 jasymda «Egemenge» keldim. Sheraǵań jumysqa alar kezde betime qarap otyryp «Kári emes pe?» degeni esimde. Buıryqqa qol qoıyp jatyp, elge barǵan soń ne jazatynymdy surady. Tamyz aıy edi. Egin oraǵy qyzý júrip jatyr. Sony aıtyp edim, oraq maýsymyn ekiniń biri jazatynyn, al meniń oblys jabylǵanda Jezqazǵanǵa kóshirilgen qazaq teatry týraly jazýym kerektigin eskertti. Elge kelgen soń oblys basshysy Ýkınge aıtyp edim, ol oraqty nege jazbaısyń, qazir kúıip turǵan sharýa osy, dedi. Men munyń Sheraǵańnyń tapsyrmasy ekenin aıtyp edim, oblys basshysy úndemeı otyryp qaldy, deıdi jyly estelikterimen bólisken Q.Álim. Al «Sosıalıstik Qazaqstanǵa» 27 jasynda kelgen J.Elshibek gazetti basýǵa kúndelikti qansha tonna qaǵaz jumsalatynyn jáne gazet basylatyn baspahananyń «Dáýir» atalýy Sheraǵańnyń tikeleı yqpalymen bolǵanyn atap ótip, búginde zamanaýı tehnologııanyń jetistigimen oqyrmandar sany ınternette de artyp otyrǵanyna, gazettiń barlyq beti túrli-tústi boıaýmen jarqyrap shyǵyp jatqanyna, basylymnyń ýaqyt talabymen úılesimdi úndeskenine aıryqsha qýanatynyn aıtty.
Dýman ANASh,
«Egemen Qazaqstan»
