Topyraǵy tuzdy ári qunarsyz munaıly óńirde jemis-jıdek pen kókónis ósirý ońaı emes. Alaıda, Vladımır Rozmetov úshin qıyn jumys joq. Ol úlken alma baǵym bolsa dep armandaǵan, qazir almanyń 30-dan astam túrin ósiredi. «AtyraýAgroО́nimderi» sharýa qojalyǵyn quryp, kópbeıindi keshen saldy.
Mahambet aýdanynda ornalasqan qojalyqta jemis baǵy, kókónis baqshasy, asyl tuqymdy mal sharýashylyǵy bar. Shoshqa, taýyq pen balyqtyń da san túrin osynnan tabasyz. Edilbaı tuqymdy qoı men serbtik eshkilerdiń ósirilgenine biraz ýaqyt boldy. «Saraıshyq» asyl tuqymdy eshki sharýashylyǵy 14 túrli sút ónimderin shyǵarady. Eýropalyq qural-jabdyqtardy paıdalanatyn elimizdegi biregeı joba óz jemisin berip keledi.
Izdený men eńbektenýden talmaıtyn sharýashylyq basshysy endi lımon ósirýdi qolǵa alypty. Negizinen sýbtropıkalyq aımaqta ósetin, sýyqqa tózimsiz ósimdikti Atyraý topyraǵyna jersindirýge biraz kúsh kerek. Biraq tyǵyraqtan shyǵatyn jol da bar. Tashkenttegi lımonarııadan eki myń lımon aǵashyn satyp alǵan kásipker Mahambet aýylyndaǵy jerine ekti.
«Lımonnyń «Mır» dep atalatyn surpyn ósirýge jergilikti klımattyq erekshelik pen topyraq quramy qolaıly. Qazir Tashkentten kelgen eki ǵalym kóshetterdi baqylaýǵa aldy. Olar alǵashqy ónim alǵanǵa deıin qandaı sharalar atqarý kerek ekenin túsindiredi. Bıyl tek ósiriledi, aldaǵy kúzde jylyjaı jasaımyz. Keler jyldyń kókteminde ár aǵash 15 kelige deıin jemis beredi degen jospar bar», deıdi Vladımır Rozmetov.
Al tórt jyldan keıin ár aǵashtan 150 kelige deıin lımon alýǵa bolady eken. Bul jobany qolǵa alǵansha kásipker jergilikti naryqty zerttegen. Qazir Atyraýdaǵy saýda oryndarynda bir lımonnyń baǵasy 200 teńgege deıin jetedi. «Al «AtyraýAgroО́nimderiniń» lımony budan eki ese arzan bolady», deıdi kásipker.
Baqytgúl BABASh,
«Egemen Qazaqstan»
