Jarysta elimizdiń túkpir-túkpirinen kelgen sportshylar, sonymen qatar, Armenııa, Grýzııa, Ázerbaıjan, Qyrǵyzstan, Reseı memleketterinen kelgen barlyǵy 280-nen astam jas balýan baq synady.
Jarystyń saltanatty ashylý rásimi lazerlik shoýmen bastalyp, arnaıy kelgen qurmetti qonaqtardyń tilegimen jalǵasty. QR Sport jáne mádenıet mınıstrliginiń bas hatshysy Qýatjan Ýalıev, Almaty qalasy ákiminiń orynbasary Arman Qyryqbaev, KSRO eńbek sińirgen sport sheberi, Olımpıada oıyndarynyń júldegeri Dáýlet Turlyhanov jas balýandarǵa alǵysyn bildirip, sáttilik tiledi. Olar dańqty balýan Jaqsylyq Úshkempirovti 1984 jyldan bastaý alǵan dástúrli týrnırimen quttyqtap, «Hyundai Creta» temir tulparyn syıǵa tartty.
Eki kúnge sozylǵan básekede qazaq palýandary 5 altyn, 6 kúmis jáne 9 qola medaldy enshilep, jalpykomandalyq esepte kósh bastady. Jalpy jarys qorytyndysy boıynsha jaýyryny jerge tımegen Alpamys Dastanbek (Qazaqstan, 50 kg), Ernur Fıdahmetov (Qazaqstan, 55 kg), Ernar Fıdahmetov (Qazaqstan, 60kg), Mereı Bekenov (Qazaqstan, 66kg), Beka Mamýkashvılı (Grýzııa, 74 kg), Temýrı Skýaselıdze (Grýzııa, 84 kg), Elmar Ýkalı (Qazaqstan, 96 kg), Zvıadı Patarıdze (Grýzııa, 120 kg) syndy balýandar altyn júldeger atandy. Jeńimpazdar men júldegerler dıplom, medal, sondaı-aq, baǵaly uıaly telefondarmen marapattaldy.
«Biz ómirimizdi sportqa arnadyq, maqsattarymyzǵa jetý úshin aıanbaı eńbek ettik. Elbasy men elimizdiń qoldaýynyń arqasynda osyndaı nátıjege jetip, halyqtyń úmitin aqtadyq. Memleketimiz sporttyń damýyna barlyq jaǵdaı jasap otyr. Sporttyq alańdar men sport túrlerinen tegin seksııalar kóptep ashylyp jatyr. Munyń barlyǵy el birliginiń arqasynda. Baýyrjan Baıbek myrzaǵa osy týrnırdi uıymdastyrýǵa kómek kórsetkeni úshin alǵysymdy bildiremin. Týrnır tek men úshin emes, sizder úshin, balalardyń bolashaǵy men ósip kele jatqan urpaq úshin. Jas palýandarymyzdyń halyqaralyq dodalarda joǵary dárejede óner kórsetip top jarýyna tilektespin», dedi Jaqsylyq Úshkempirov.
Atalǵan týrnır Almaty qalasynyń dene shynyqtyrý jáne sport basqarmasynyń, QR Mádenıet jáne sport mınıstrliginiń, Qazaqstan kúres Federasııasynyń qoldaýymen grek-rım kúresin jastar arasynda dáripteý, kórshiles elder sportshylary arasynda dostyq qarym-qatynasty nyǵaıtý, «QR sport sheberi» normatıvin oryndaý, QR memlekettik qurama komandasyna úzdikterdi irikteý maqsatynda uıymdastyrylǵan.
Arman OKTIаBR,
«Egemen Qazaqstan»
