«RFMM» KeAQ uıymdastyrýymen tuńǵysh ret ótken atalmysh baıqaýdyń basty maqsaty – 8-11 synyp oqýshylary arasynan eń belsendi ári daryndy balalardy anyqtaý, olarǵa qoldaý kórsetý, sondaı-aq, olardyń ǵylymı-zertteý jumystary men ınnovasııalyq talpynystaryna muryndyq bolý.
Fızıka, hımııa, bıologııa, robototehnıka, ınformatıka baǵyttary boıynsha ótkizilgen saıystyń basty ereksheligi – oqýshylar jekelegen pánder boıynsha emes, ǵylymnyń túrli salasynyń basyn qosqan jobalaryn ádilqazylar alqasynyń synyna usynypty.
Almaty, Astana jáne Taraz qalalarynyń mektepterinen baıqaýǵa qatysqan jas ónertapqyshtar tolyǵymen avtomatty túrde jumys isteıtin «Aqyldy úı», óndiris pen adamdardyń kúndelikti qoldanysyna qajetti kompıýterlik qoldanbaly baǵdarlamalar, ekonomıkanyń túrli salasyna arnalǵan óz jobalaryn usyndy. Bolashaq ınnovatorlar tipti, «máńgilik qozǵaltqyshtyń» da (Perpetuum Mobile) kezekti nusqasyn oılap tabýǵa talpynǵan eken.
Jas daryndar jumysyn RFMM-men áriptestik ornatqan ATHÝ, QazUZTÝ, ál-Farabı atyndaǵy QazUÝ, SDU sekildi joǵary oqý oryndarynyń ustazdarynan turatyn ádilqazylar alqasy baǵalady.
Elektrli-núktelik dıagnostıka jasap, smartfon qosymshasy arqyly adam aǵzasyna dıagnoz qoıa alatyn qolǵap oılap tapqany úshin N.Nazarbaev zııatkerlik mektebiniń oqýshylary Keńesbekov Álimjan men Asanqul Azamat bas júldeni utyp alsa, «Aqyldy úı» jobasyn usynǵan Býrabaeva Aıdana men Beısenov Ulan, «balama qýat kózin» oılap tapqan Gýra Maksım, Aımysheva Arna syndy oqýshylar da júldeli oryndar ıelenip, baǵaly syılyqtarmen marapattaldy.
Oqýshylar usynǵan otelder jumysyn avtomattandyrý, balamaly energııa negizinde tońazytqyshtar jasaý, aǵyn sýlardy altyvalentti hrommen zararsyzdandyrý sııaqty kóptegen jańashyl ári tyń ıdeıalarǵa toly bastamalardyń árqaısysy da atap ótýge laıyq aıryqsha eńbek ekeni anyq.
Bolashaqta bul baıqaýdyń aıasy keńeıip, bıznesmender qyzyǵýshylyq tanytyp, ǵylymı jumystar jármeńkesi startap jobalardyń jolyn ashatyn orynǵa aınalady degen úmit bar.
Mıra BAIBEK,
«Egemen Qazaqstan»
