Jýyrda ǵana elorda tórinde Elbasynyń tóraǵalyǵymen ótken Qazaqstan halqy Assambleıasynyń XXV sessııasynda eldiń saıası-ekonomıkalyq, mádenı-rýhanı ómirinde Assambleıanyń alatyn orny aýqymdy ekeni keńinen aıtyldy. Elbasy óz sózinde: «Birinshi. Týǵan jer jobasy Assambleıa úshin zor múmkindikterge jol ashyp beredi. Ekinshi. «Qazaqstannyń 100 jańa esimi» jobasyna Assambleıa tikeleı qatysyp, basy-qasynda júrýi kerek. Bizdiń qanshama zamandastarymyz, qanshama Assambleıa belsendileri el ıgiligi úshin rııasyz qyzmet etip júr. Ultyna, qaı óńirden ekenine, jynysyna qaramastan, biz olardyń barlyǵyn elge tanyta bilýimiz kerek», – degen bolatyn. Búgingi basqosýdyń negizgi maqsaty – sonda aıtylǵan oılar men júktelgen mindetterdi júıeli túrde júzege asyrýdyń joldaryn izdeýge arnaldy.
– Elbasy Qazaqstan halqy Assambleıasyna zor senim artyp keledi. Sol senimniń mejesinen shyǵý úshin el ıgiligi jolynda adal qyzmet atqaryp, táýelsiz Otanymyzdyń gúldenýine bárimiz qaltqysyz qyzmet etýimiz qajet. Turaqtylyq pen damý, tatýlyq pen dostyq – bárimizge ortaq qasterli qundylyqtar. Prezıdentimiz Assambleıanyń áleýetin arttyrýda qalalar men oblystar basshylaryna birqatar tapsyrmalar berip, birneshe mańyzdy jobany birlese iske asyrýdy tapsyrdy. 2018 jyly Qazaqstan halqy Assambleıasynyń kóp fýnksııaly mýltımedıalyq portalyn ashýdy, «Qazaqstan halqy» ınteraktıvti tarıhı kartasyn jasaýdy qolǵa alý kerektigin aıtty. Kásipkerler men bıznes, shyǵarmashylyq jáne ǵylymı zııaly qaýym ókilderin «Týǵan jer» jobasyna qatysýǵa jáne óz aýyldastaryn qoldaý maqsatynda kúsh jumyldyrýǵa shaqyrdy. Árbir Assambleıa múshesiniń kókeıinde júrgen arman-tilektiń tamyryn tap basty. Sondyqtan, alǵa qoıǵan maqsat-mindetterdi, Elbasynyń tapsyrmalaryn oryndaýda tabandylyq tanyta bileıik. Sondaı-aq, jańa orynbasarlar taǵaıyndalyp, olarǵa zor jaýapkershilik júkteldi. Sol senim júgin talmaı kótereıik, – dedi Qazaqstan halqy Assambleıasy Tóraǵasynyń orynbasary – QHA Hatshylyǵynyń meńgerýshisi Darhan Myńbaı.
Shara barysynda QHA-ǵa qarasty etnomádenı birlestikterdiń basshylary da sóz alyp, aldaǵy ýaqytta atqarylatyn sharýalardyń josparyn ortaǵa saldy. «Tatýlyq pen birlik bizdiń basty uranymyz», degen Assambleıa músheleri ortaq maqsat jolynda kúsh biriktirý kerektigin aıtyp, Dostyq úıinen joǵary kóńil kúımen tarasty.
Arman OKTIаBR,
«Egemen Qazaqstan»
ALMATY
