QR Bilim jáne ǵylym mınıstrliginiń uıymdastyrýymen ótken chempıonatta elimizdiń túpkir-túpkirinen jınalǵan 400-den astam jas maman synǵa tústi.
Qazaqstanda úshinshi ret uıymdastyrylyp otyrǵan «Worldskills Kazaqstan» jobasy bıyl Elbasy N.Á. Nazarbaevtyń «100 naqty qadam» Ult Josparyn júzege asyrý sheńberinde jalpy eńbek qoǵamyn qurý jáne jumysshy mártebesin arttyrý maqsatynda ótkizilip otyr.
Ulttyq chempıonatta Ońtústik Qazaqstan oblysynan barǵan oqýshylar 9 quzyrettilik (mamandyq) boıynsha saıysqa túsip, aldyńǵy qatarǵa shyqty.
Atap aıtqanda, №6 kolledjdiń stýdenti «aspaz isi» mamandyǵy boıynsha Altynbek Ábilhaıyr altyn medal, №16 kolledjdiń stýdentteri «Qurǵaq qurylys jáne sylaq jumystary» boıynsha Taýbaı Janarys kúmis medal jáne «pisirý isi» quzyrettiligi boıynsha Seıdýlla Oljas kúmis medal ıelendi. Sonymen qatar, Túrkistan gýmanıtarlyq-tehnıkalyq kolledj stýdenti «Dızaın jáne kıimderdi modeldeý» quzyrettiligi boıynsha Qasymova Oǵlaı kúmis medal, Joǵarǵy jańa tehnologııalar kolledji «Plıtka japsyrý» boıynsha Tólesh Erkebulan kúmis medal jeńip alsa, Jol-kólik kolledji stýdenti «Injenerlik grafıka CAD» quzyrettiligi boıynsha kúmis medaldi Joldasbaı Baqbergen jeńip aldy.
Jarys qorytyndysy boıynsha altyn medal ıegeri «aspaz isi» mamandyǵy boıynsha Altynbek Ábilhaıyr Qazaqstannyń ulttyq qurama komandasymen qazan aıynda Ábý-Dabı qalasynda ótetin WorldSkills Competition álemdik chempıonatyna qatysady dep kútilýde.
