«Bul kartaǵa mýltımedııalyq qurylymdar arqyly elektrondy qoljetimdilik, ıaǵnı, navıgasııalyq júıe jáne ınternetpen nysannyń ornalasqan orny týraly málimetti bilýge bolady, dedi mınıstr. Sondaı-aq elimizdegi ǵajaıyp tarıhy bar kıeli jerlerge qazaqstandyqtardan góri shet eldikterdiń kóbirek keletinin jasyrmady. Sondyqtan Qazaqstannyń sakraldi kartasy aldymen ózimizge, óz elimizdi tereńirek taný úshin kerek», dedi mınıstr.
A.Muhamedıuly Joldaýda vedomstva aldyna ishki jáne syrtqy týrızmdi jańǵyrtý boıynsha aýqymdy mindetter qoıylǵanyn, sońǵy 5 jylda týrızm boıynsha ishki ónimniń ósimi 15 paıyzdy quraǵanyn atap ótti. Búginde bul salada 530 myń adam jumyspen qamtylyp otyr. Týrıstik salany damytýdyń 2020 jylǵa deıingi jańa tujyrymdamasy ázirlendi. Barlyq sharalar Memleket basshysynyń qoǵamdyq sanany jańǵyrtý jónindegi tapsyrmasyna sáıkes júzege asyrylyp keledi, dedi mınıstr. Sondaı-aq jýyrda ǵana Elbasy qol qoıǵan «Mádenıet týraly» jańartylǵan zańnamada mádenı murany saqtaý men nasıhattaýǵa arnalǵan qarjylandyrý kózderi anaǵurlym artqanyn, teatrlar men mýzeıler úshin memlekettik satyp alý barysy jeńildetilgenin jetkizdi.
Jaqynda biz Premer-Mınıstr keńsesine 2020 jylǵa deıingi týrızmdi damytý tujyrymdamasyn usynamyz. Munda barlyq qadamdar qamtylǵan. Týrızmge elimizdi jańǵyrtýdaǵy negizgi salanyń biri retinde basymdyq berilgeni qýantady. Bul – búkil álemde tartymdy, tabysy mol sala. Elimizde ótken qysqy Ýnıversıada týrısterdi tartýdy, elimizdi tanystyrýdy kózdedi. Ýnıversıada kezinde álemdik sport arnalary táýlik boıy elimizden habar taratty. Bul kezde mıllıardtaǵan telekórermenderdiń nazary bizge aýdy. Qazir Almaty qalasyna, ondaǵy qysqy sport túrlerin damytýǵa erekshe yqylas bar. Tipti, Qytaı quramasy da qysqy Olımpıadaǵa Qazaqstanda daıyndalýǵa qyzyǵýshylyq tanytyp otyr, dedi Mádenıet jáne sport mınıstri.
Dýman ANASh,
«Egemen Qazaqstan»
