Bıylǵy chempıonatta tóreshilerge arnalǵan semınar da bolady. Dúnıejúzilik qazaq kúresi federasııasynyń birinshi vıse-prezıdenti Serik Tókeevtiń aıtýynsha, jıynda uıymnyń tóreshileri afrıkalyqtarǵa tól kúresimizdiń erejelerin úıretip, tájirıbelerimen bólisedi.
«Jaqyn kúnderi Afrıkada ulttyq kúresimizden qurlyqtyq chempıonat ótkizemiz. Bul – Dúnıejúzilik qazaq kúresi federasııasynyń Keıptaýnda ekinshi ret uıymdastyryp jatqan jarysy. Birinshi chempıonat eresekter arasynda 2013 jyldyń 26 aqpan men 3 naýryz aralyǵynda bolǵan edi. Sol kezde jarysqa Ońtústik Afrıka Respýblıkasy, Zımbabve, Botsvana, Svazılend, Gabon men Nıgerııa memleketteriniń palýandary qatysqan. Al bıylǵy dodada 6 emes, endi 15 eldiń ókilderi baq synasady. Onyń taǵy bir ereksheligi, chempıonat erler jáne áıelder arasynda ótedi. Jańa aıtqan elderdiń sportshylary jarysqa taǵy da qatysamyz dep belin býyp otyr. Odan basqa Seıshel araldary, Mavrıkıı, Kongo Demokratııalyq Respýblıkasy, Benın, Malavı, Namıbııa, Ýganda men Ońtústik Afrıka Respýblıkasynyń Goteng, Shyǵys Keıp, Soltústik Keıp jáne Batys Keıp provınsııalary jeke komanda bolyp qatysady», deıdi Serik Tókeev.
