Qandasymyzdyń kezekti róli

Sankt-Peterbýrgtegi Sherhan Ábilev týraly buryn da jazǵan bolatynbyz. Eske sala ketsek, osynaý kentaýlyq azamat Reseıdiń soltústik astan­a­synda uzaq jyldardan beri turady. Týmysynan ónerge ja­qyn jan mamandyǵy taý-ken ınjeneri bolsa da osy jerde shyǵarylǵan birneshe fılmderge túsken. Qazir onyń kınoda oınaǵan rólde­riniń sany tipti 90-ǵa jetip qalypty. Sonyń ishinde orys­tyń «Osobennostı nasıonalnoı polıtıkı», «Ýlısy raz­bı­tyh fonareı», «Bandıtskıı Peterbýrg» jáne t.b. ataqty fılmderinde de ol birneshe obrazdardy somdady. 2007 jyly «Lenfılm» túsirgen «Djambýl» atty fılmde ol basty róldi oınap, ekranda jyr alybynyń beınesin jasady. Shekeń jýyrda taǵy bir fılmge túse bastapty. «Mostelefılm» telekompanııasy 1991 jylǵy tamyz oqıǵasyna arnap «Elsın. Trı dnıa v avgýste» (jumystaǵy ataýy) atty fılm túsirýdi qolǵa alyp, onda Qazaqstan Prezıdenti N.Nazarbaevtyń rólin oınaýǵa Sherhan Ábilevti sha­qyr­ǵan eken. Fılm ssena­rııi­niń avtory – O.Antonov, al rejısseri – A.Mohov. Ekeýi de Reseıdiń kıno ónerine ta­ny­mal esimder. Máselen, A.Mo­hovtyń «Ýchıtel v zakone», «Kýkla dlıa nevesty», «Vorıshka» jáne basqa fılm­deri bar. Al O.Antonov drama, komedııa, melodrama janr­larynda ta­nymal ssenarııshi. Osy kúnge deıin 12 fılmniń ssenarııin jazǵan. Sonyń ishinde «Svobodnaıa jenshına», «Novogodnıı detektıv», «Sırota kazanskaıa» degen fılmderi keńinen tanymal. Al «Smer­telnyı nomer» atty pesasy 1994 jyly «Hrýs­talnyı Týrandot» syılyǵyn alǵan. Biraq eki avtor da osy ýaqytqa deıin saıası taqy­rypqa baryp kór­megen eken, bul alǵashqy tal­pynystary kórinedi. Fılmniń oqıǵasy 1991 jylǵy tamyz búligine arnal­ǵan. Prezıdent N.Nazarbaev­tyń beınesi búliktiń aldyn­daǵy Novo-Ogarevoda Elsın, Nazarbaev jáne Gorbachev úsheýi­niń ońasha kezdeskendegi sátin­de kórinedi. Osyndaǵy qu­pııa áńgimeler artynan barsha álemge belgili bolyp qalǵany belgili. Onda Elsın men Nazarbaev Gorbachevten jańa odaq­ta eski basshylardyń óz taqtarynda qalmaýyn talap etken bolatyn. Fılmde sol usynys búliktiń uıymdasty­rylýyna negiz bolǵan degen oı meńzeledi. Sherhan Ábilev kınoǵa túsýmen qatar, kitap jazýmen de aınalysady. Ol sońǵy jyldary «Iz S-Peterbýrga s lıýbovıý», «Kıno stalo moeı jıznıý», «My syny kazahskıh stepeı» jáne t.b. jı­naqtar qurastyrǵan. Jaqsybaı SAMRAT.