«Jolda balalardyń qaýipsizdigin saqtaý» respýblıkalyq aksııasynyń sheńberinde Qostanaı qalalyq jergilikti polısııasy balalarǵa 500 dana shaǵyldyra jarqyldaıtyn salpynshaq áshekeı taratty.
Oblystyq ishki ister departamentiniń málimetinshe, joldardaǵy kólik apatynan júrginshi balalar jıi zardap shegedi. Jyl basynan beri oblys eldi mekenderindegi joldarda 12 balany kólik qaǵyp ketken. Polıseıler balalarǵa taratqan áshekeı salpynshaqty olar kitaptaryn salyp, arqalaryna asynyp alatyn rıýkzagine taǵyp alýyna bolady. Ony taratýǵa «Grın» Azamattyq alıansy men oblystaǵy isker áıelder qaýymdastyǵynyń fılıaly atsalysty.
«Jyl basynan beri balalardyń qatysy bar 17 jol-kólik oqıǵasy tirkelgen, sonyń 12-de júrginshi balalardy kólik qaqqan, odan 19 jasóspirim jaraqat aldy. 4 jol kólik apaty balalardyń kinásinen bolǵan. Jaz aılarynda balalar bos bolǵandyqtan, kóshede jıi júredi, sondyqtan ata-analarǵa da úıde jol erejesin saqtaýdy aıtyp otyrýdy eskertip kelemiz», deıdi jergilikti polısııa basshysynyń orynbasary Qurmet Májikenov.
Polıseılerdiń aıtýyna qaraǵanda, jol apatyna negizinen kóshede júgiretin 7-12 jastaǵy balalar jıi ushyrap jatady. О́ıtkeni boıy kishkentaı bolǵandyqtan júrgizýshiler olardyń jolǵa shyǵa kelgenin baıqamaı, tejegishti ýaqytynda basyp úlgermeı qalady.
Respýblıkalyq aksııa 1 maýsymǵa deıin sozylady.
Názıra Járimbetova
«Egemen Qazaqstan»
