«Jobanyń basty maqsaty - qoǵam arasynda tabystylyqty, merıtokratııa prınsıpterin, básekege qabilettilikti, pragmatızm men Qazaqstannyń qazirgi damýyna úlken úles qosqan azamattardyń bilimin nasıxattaý jáne aqparattyq turǵyda keńinen tanymal etý. Bul - úlgi bolarlyq bizdiń zamandastarymyzdyń ómirlik tájirıbeleri, júrip ótken dańǵyl joldary», dedi mınıstr «Bolashaqqa baǵdar, rýhanı jańǵyrý» atty Elbasy maqalasynda aıtylǵan «Qazaqstannyń 100 jańa tulǵasy» atty jobany júzege asyrý boıynsha qurylǵan jumys tobynyń otyrysynda.
Mınıstrdiń atap ótkenindeı, bul tizimge túrli salada jetistikke jetken Qazaqstannyń eń eleýli azamattary kiretin bolady. Onyń aıtýynsha, mundaı jobalar ózge memleketterde de júzege asyrylǵan. Jumys tobynyń maqsaty - Qazaqstannyń eń tabysty 100 tulǵasyn izdestirý jáne irikteý.
«Jumysty kelesi baǵyttarda uıymdastyrýdy usynamyn: birinshisi - jumys tobynyń músheleri men jergilikti atqarýshy organdardan usynystardy jınaqtaý. Bul kezeńde ulttyq deńgeıde joba úmitkerleri anyqtalady. Osydan soń, naqty merzimder men medıa-jospar jasalady», dedi D. Abaev.
Aıta keteıik, Memleket basshysynyń tapsyrmasymen Aqparat jáne kommýnıkasııa mınıstrligi men Qazaqstan xalqy Assambleıasy Hatshylyǵy «Qazaqstannyń 100 jańa tulǵasy» áleýmettik jobasyn júzege asyratyn bolady.
