Aıta keteıik, Túrkistanda ótken sharany Ońtústik Qazaqstan oblysy ákimdigi men Halyqaralyq Túrki akademııasy uıymdastyrǵan bolatyn. Oǵan Qazaqstan, Ázerbaıjan, Bashqurtstan, Belgııa, Qyrǵyzstan, О́zbekstan, Tatarstan men Túrkııa memleketteriniń buqaralyq aqparat quraldarynyń basshylary men jýrnalısteri qatysyp, túrki áleminiń ortaq aqparattyq keńistigin qalyptastyrý – túrkitildes memleketterdiń yntymaqtastyǵyn nyǵaıtyp, ortaq mádenıet pen órkenıet qalyptastyrý máselesin talqylady.
Forýmnyń ashylý saltanatynda Ońtústik Qazaqstan oblysynyń ákimi Janseıit Túımebaev kirispe sóz sóılep, atalǵan forým «Túrkistan - Túrki áleminiń mádenı astanasy» aıasynda ótkiziletin is-sharalardyń ishindegi mańyzdy jıynnyń biri ekendigin aıtyp, búgingi forýmǵa qatysýshylarǵa aqparattyq keńistiktegi máselelerdi talqylap, belsendi qatysýǵa shaqyrdy. Sonymen qatar, óńir basshysy túrki elderiniń rýhanı baılyǵyn molaıtýǵa qosqan eleýli úlesi úshin Halyqaralyq Túrki akademııasynyń prezıdenti Darhan Qydyrálini «Ońtústik Qazaqstan oblysyna sińirgen eńbegi úshin» medalimen marapattady.
Ashylý saltanatynda sondaı-aq, TÚRKSOI halyqaralyq uıymynyń Bas hatshysy Dúısen Qaseıinov, Túrkııa, Ázirbaıjan, О́zbekstan, Qyrǵyzstan elderiniń bedeldi BAQ basshylary sóz sóılep, ózderiniń pikirlerin, usynystaryn ortaǵa saldy.
Darhan Qydyráli júrgizgen forýmnyń alǵashqy otyrysynda qatysýshylar «Aqparat almasý máselesi» taqyryby boıynsha pikir almasty. Atap aıtqanda, Ázerbaıjan baspasóz odaǵynyń Basqarma múshesi, «Şark» gazetiniń Bas redaktory Akıf Ashyrly Valıev, ózbekstandyq «Túrkistan press» aqparat agenttiginiń Bas redaktory Ýlýǵbek Asrorov, respýblıkalyq «Aıqyn» gazetiniń Bas redaktory Nurtóre Júsip, túrkııalyq Anadolu Ajansı memlekettik aqparat agenttiginiń Bas redaktory Farýk Tokat, qyrǵyzstandyq «Kyrgyz týýsý» basty resmı gazetiniń jaýapty hatshysy Nazarbek Baıjıgıtov pen túrkııalyq «Yeniçağ» gazetiniń sarapshysy Kúrshad Zorlý Túrki álemine ortaq aqparat almasý taqyrybynda baıandamalar jasady. Ekinshi otyrystyń qatysýshylary Elbasy Nursultan Nazarbaevtyń 2014 jylǵy Bodrým Sammıtinde usynǵan túrki dúnıesiniń ortaq telearnasyn qurý máselesin jan-jaqty talqylap, óz usynystaryn bildirdi.
Forým aıasynda Túrki álemin bir-birine jáne álem jurtshylyǵyna nasıhattaýǵa sińirgen eńbegin marapattaý jáne yntalandyrý maqsatynda Halyqaralyq Túrki akademııasy taǵaıyndaǵan Ismaıl Gaspyraly atyndaǵy halyqaralyq Medıa syılyqtyń ıegerleri marapattaldy. Atap aıtqanda, túrkııalyq «Yeniçağ» gazetiniń sarapshysy Kúrshad Zorlý, Ázerbaıjannyń belgili qalamger-jýrnalısi Aıda Eıvazova, «Qazaqparat» halyqaralyq aqparat agenttiginiń bas dırektory Asqar Ýmarov pen túrkııalyq NTV arnasynyń baǵdarlama redaktory Ahmet Ieshıltepe Medıa syılyqtyń alǵashqy ıegerleri atandy.
Ǵalymjan Elshibaı,
"Egemen Qazaqstan"
