«Astana Arena» stadıonynda aldymen «Oqjetpes» komandasy «Qaıratty» qabyldady. Bul kezdesýde alań ıelerinen Sergeı Strýkov 29 jáne 68-mınýttarda mergendigimen tanylyp, esepti 2:0-ge jetkizdi. «Qaırat» ótken oıynda Atyraýdaǵy jeńilisin qaperde ustap, osydan keıin shıraq qımyldaı bastady. Aldymen 74-mınýtta Andreı Arshavın esep aıyrmasyn qysqartsa, araǵa bir mınýt salyp, brazılııalyq oıynshy Isael Barboza tarazy basyn teńestirdi. Al oıynǵa ekinshi taımnan qosylǵan Baýyrjan Turysbek 79-mınýtta jeńisti goldyń avtory atandy. «Qaırat» osylaısha eki dop aıyrmasymen utylyp jatyp, 3:2 esebimen jeńiske jetti.
Dál osy stadıonda jergilikti «Astana» komandasy Pavlodardyń «Ertisimen» kúsh synasty. Oıyndaǵy alǵashqy goldy 13-mınýtta elordalyqtar sapynan Roman Murtazaev saldy. Matchtyń 79-mınýtynda Dıdar Jalmuqan sońǵy núkteni qoıdy. Osylaısha elordalyqtar 2:0 esebimen basym tústi. Týrnırlik kestede «Astana» negizgi qarsylastarynan bir oıyn az ótkizse de 27 upaımen kósh bastap keledi.
Sonymen qatar, Shymkenttiń «Ordabasy» klýby syrt alańda «Atyraýmen» kezdesip, 2:2 esebimen teń tústi. Bul matchta esepti shymkenttik ujymnyń shabýylshysy Tańat Nóserbaev ashqanmen, alań ıelerinen Eldar Abdrahmanov pen Farhat Salomov bir-bir goldyń avtory atandy. Degenmen, negizgi ýaqyttyń aıaqtalýyna bes mınýt qalǵanda Azat Nurǵalıev penaltıdi sátti oryndap, esepti 2.2-ge jetkizdi.
Qaraǵandyda jergilikti «Shahter» ujymy Oraldyń «Aqjaıyǵyn» qabyldap, 1:0 esebimen basym tústi. Jeńisti goldyń avtory – Aıdos Táttibaev. Osy jeńisiniń arqasynda «Shahter» týrnırlik kestede 11-orynǵa kóterildi. Aıta keterligi, bul kúni qaraǵandylyq klýb uzaq jyldar boıy komandany órge súıregen Andreı Fınonchenkomen qoshtasý rásimin ótkizgen bolatyn.
Al «Taraz» «Qyzylordanyń» «Qaısaryn» qabyldap, 2:1 esebimen jeńiske jetti. Bul oıynda «Qaısar» sapynan Maqsat Baıjanov esep ashsa, alań ıelerinen Muhammed Dıarra men Abzal Taýbaı qonaqtardy qapy qaldyryp ketti. Osy jeńisinen keıin tarazdyqtar 10-orynǵa kóterildi.
Al «Aqtóbe» óz alańynda Qostanaıdyń «Tobylymen» kúsh synasyp, 1:3 esebimen ese jiberdi. Bul kezdesýde «Tobyl» sapynan Alekseı Shetkın, Sergeı Malyı jáne Raýl Jalılov bir-bir goldyń avtory atansa, aqtóbelikterden jalǵyz goldy Iýrı Mamýte saldy. Osylaısha, «Aqtóbe» kesteniń sońǵy ornyna syrǵydy.
Aıta keteıik, Qazaqstan premer-lıgasynyń kelesi týry 20 mamyrda ótedi. Bul týrda myna komandalar kúsh synasady:
«Aqjaıyq» – «Astana»,
«Ertis» – «Atyraý»,
«Ordabasy» – «Aqtóbe»,
«Tobyl» – «Oqjetpes»,
«Qaısar» – «Shahter»,
«Qaırat» – «Taraz».
