Esirtki quraldaryn óndirýdiń shıkizat bazasy bolyp tabylatyn jabaıy soranyń oblys aýmaǵynda 130 myńnan astam gektar jerdi alyp jatýy zańsyz esirtki aınalymyna qarsy kúres jaǵdaıyn kúrdelendire túsýde. Bul másele týraly oblystyq ishki ister departamenti bastyǵynyń birinshi orynbasary Berik Qutbaev málimdedi. «Maqsatty atqarylǵan jumys nátıjesinde esirtki bıznesine qarsy kúreste oń nátıjelerge qol jetkizildi» dese de, Berik Mederbekuly oblys aýmaǵynda ótken jyly esirtkige qatysty 622 qylmystyq quqyq buzýshylyq anyqtalǵanyn da atap ótti. Onyń ishinde 328 qylmys pen 294 qylmystyq teris qylyq anyqtalsa, esirtki zattaryn satýdyń 138 deregi boıynsha is qozǵalǵan. Bul kórsetkish qylmys ashylyp, naqty jumys atqarylǵanyn kórsetse de, esirtki bınesi naryǵyn qalyptastyrǵysy keletinderdiń áreketsiz otyrmaǵanyn da aıǵaqtaıdy.
О́tken jyldyń kórsetkishi jaqsy. Degenmen, bıylǵy jyldyń ahýaly qandaı? Bul turǵyda oblys ákimi Kárim Kókirekbaev departament tarapynan 2017 jylǵa arnalǵan eshqandaı jospar kórip turmaǵanyn aıtty. Sondaı-aq, Jambyl oblysy kórshi Qyrǵyz Respýblıkasymen 716 shaqyrymda shektesedi. Nashaqorlyq pen esirtki bıznesin boldyrmaýda shekarashylar arqyly eshqandaı quzyrly mekemeniń memorandýmǵa qol qoımaǵanyn da synǵa aldy.
Sonymen qatar, Kárim Kókirekbaev nashaqorlyqtan jasyryn emdelýshiler bar ekenin, olardyń kim ekenin jarııalaý kerektigin aıtty. Onyń aıtýynsha, sonda ǵana esirtki bıznesine qarsy kúres qalypqa keledi. Shynynda, mundaı keleńsiz jaımen aınalysý kóbinese jasóspirim shaqtan bastalady. Oblysta 459 mektep bar bolsa, onda 39 myń muǵalim qyzmet etedi. Bul turǵyda muǵalimdermen qatar, mekteptegi medbıkeler men ınspektorlar da jumysyn kúsheıtýleri qajet ekendigi sóz boldy.
Hamıt ESAMAN,
«Egemen Qazaqstan»
Jambyl oblysy
Sýretti salǵan Aıdarbek ǴAZIZULY,
«Egemen Qazaqstan»
