Shara barysynda baıqaýdyń júrgizýshileri birinshi maýsymnyń qos jeńimpazy Merhat pen Marııaǵa Parıjge saıahattaýǵa joldama berilgenin xabarlady. Kishkentaı juldyzdar ótken jyly «Ǵajaıyp álem» ánin oryndap, ózderi de ǵajap ánmen birge jarqyrap kóringen bolatyn. Osy joly Marııa men Merhat baıqaýdaǵy ózderiniń təlimgeri, tanymal ánshi Tolqyn Zabırovamen birge ən shyrqady.
Estaı atyndaǵy mádenıet saraıynyń sahnasynda ekinshi maýsymnyń ashylý qurmetine oraı, ótken maýsymda elimizdiń ár óńirinen jarqyraı kóringen 23 jeńimpaz óz ónerlerin kórsetti. Mýzykalyq shara barysynda án baıqaýyna qatysatyn daryndy ónerpazdardy tańdaýǵa, tyńdaýǵa ánshi Jubanysh Jeksenuly bastaǵan óner juldyzdary, belgili prodıýserler, rejısserler qatysyp, baldyrǵandarǵa arnaǵan quttyqtaý-tilekterin jetkizdi. Olar baıqaýda baq synaıtyn kishkentaı ónerpazdardyń arasynda bolashaq juldyzdar bar ekenine senim bildirip, balǵyndardyń boıyndaǵy úmit otyn oıata tústi.
13 mamyr kúni qaladaǵy Oqýshylar saraıynda án baıqaýynyń irikteý kezeńi ótti. Joba uıymdastyrýshylarynyń biri Tolǵanaı Qasenqyzy aıtyp ótkendeı, sharaǵa oblystyń aýdandary men qalalarynan kelgen 7-13 jas aralyǵyndaǵy 200-ge jýyq ánshi bala qatysty. Solardyń ishinen Aqsý qalasyndaǵy №8 mekteptiń oqýshysy Anastasııa Mıhaılıýktiń baǵy janyp, jeńimpaz atandy.
– Konkýrstyń bastalýyn asyǵa kútken edim. Jeńimpaz atanǵanym úshin óte qýanyshtymyn. Uıymdastyrýshylarǵa, tálimgerlerge kóp rahmet, – deıdi Anastasııa qýanyshyn jasyra almaı.
«Bala daýysynyń» endigi kezeńi 15 mamyr kúni О́skemende ótýge tıis. Osylaısha, 22 maýsymǵa deıingi aralyqta «Jandaný álemi» qorynyń tanymal mýzykanttar, kompozıtorlar men prodıýserlerden turatyn shyǵarmashylyq toby elimizdiń barlyq oblysynda, Astana, Almaty qalalarynda jobanyń irikteý kezeńderin ótkizedi. Ár qatysýshyǵa estelik syılyqtar men jobaǵa qatysqany týraly sertıfıkattar beriledi. Al olardyń mýzyka páni muǵalimderine balalarǵa arnalǵan jańa án jınaq tapsyrylady. Kúzde elimizdiń úzdik 16 daýysy «Bala daýysy» án mektebinde, Alataýdyń baýraıynda ornalasqan «Bóbek» ulttyq ortalyǵynda bas qosady. Jeńimpaz balalar elimizdiń tańdaýly mýzykalyq bilim ordalarynda bilim alýǵa grantqa qol jetkizedi, AQSh-taǵy Ertegi álemi Dısneılendke saıahat joldamasyn ıelenedi.
О́tken jyly Pavlodar oblysy boıynsha kastıngte 100-ge jýyq bala baq synaǵanyn aıta keteıik. Sóıtip, respýblıkanyń barlyq óńirinde ótken irikteý kezeńiniń qorytyndysy boıynsha 16 bala «Bóbek» ulttyq ǵylymı-tájirıbelik bilim berý jáne saýyqtyrý ortalyǵynyń «Bala daýysy» mýzyka mektebinde solfedjıo, horeografııa, ártistik sheberlik boıynsha bilimderin shyńdap, ártisterden sheberlik synyptaryn ótken bolatyn. Endi pavlodarlyq Anastasııa Mıhaılıýk te osyndaı múmkindikke ıe bolady.
Osy baıqaýdy uıymdastyrýshylardyń aıtýynsha, negizgi maqsat balalarǵa arnalǵan jańa ánderdi tanystyrý, jandandyrý arqyly kishkentaılardyń mýzykalyq shyǵarmashylyǵyn damytý ári pedagogtarǵa ádistemelik kómek kórsetý bolyp tabylady. Baıqaý qorytyndysy boıynsha «Balalar ánderiniń» jańa jınaǵy ázirlenedi. Sondaı-aq, balalarǵa arnalǵan jańa ánder jazylyp, olardyń dıskileri elimizdegi balabaqshalarǵa, mektepterge tegin taratylady.
Sonymen, baıqaýdyń ekinshi maýsymy Kereký óńirinen bastaý aldy. Sáttilik saǵan, «Bala daýysy-2017»!
Farıda BYQAI,
«Egemen Qazaqstan»
PAVLODAR
