Qamshynyń sabyndaı ǵana qysqa ǵumyrda baqytqa jetýdiń baǵasyn baǵalaýǵa umtylǵandar, biz qaıtsek te sol joldy tabamyz dep talpynady. Oǵan jetýdiń qarapaıym ǵana qaǵıdasy ne degenge kelgende, onyń altyn arqaýy túsinistik pen syılastyq ekenin uǵady. Biraq aq pen qara aıqasqan myna ómirde jaqsylyq ataýlyǵa qol jetkizý úshin nebir kedergilerdi jaryp shyǵatynyna, olardyń senimi mol bolatyn. Bul talpynysta adamdardyń nıeti men peıili túzelse, úkilegen úmit úzilmeıdi. Arman alasarmaıdy, qaıta bıiktep otbasyna baqyt qusy uıa salatyna qoıylymdy kórip otyrǵanda kóz jetkizesiń. Degenmen, spektakldegi oqıǵalardyń damýy oǵan birden qol jetkize almaıtynyńdy ańǵartady. Tek adamnyń boıyndaǵy rýhtyń myqtylyǵy, keler kúnge degen senimniń sheksizdigi, bir sózben aıtqanda adam ózi barlyq iske shydammen kelip, alǵa qoıǵan maqsatqa jetem degen oı sanańdaǵy qajyr qaıratty joǵaltpaı alǵa jeteleseń ǵana bári bolatynyna kórermendi ılandyra alady.
«Bul qoıylymdaǵy oqıǵalar, keıipkerler taǵdyry qarapaıym bolǵanymen, qarabaıyr emestigin eske sala ketkenimiz lázim. Sony tógildire jazyp, qoǵamda bolyp jatqan ózekti taqyrypty qozǵaýdyń ózi, sol arqyly jurtqa oı salý basty baǵyt edi. Jasyratyny joq, qazir úılenýdi ońaı kórip, úı bolyp qalýdyń qıyn ekenin tereń oılamaǵan keıbir jastar ózderi qalap alǵan jarlarymen alǵashynda ádemi shańyraq kóterip, artynan ajyrasyp jatady. Bul qaı qaısymyzdy da oılandyryp keledi. Mine, osy másele mono spektakldiń negizgi arqaýyn qurap otyr. Negizgi ıdeıasy – jastarǵa oı salý, oılandyrý. Búgin sen jassyń, jas otaýdyń ıesisiń, erteń ata anasyń, urpaq ósirýiń, elge qyzmet etýge tıistisiń, ýaqyt tez ótedi endeshe keleshegińniń kemel bolýyna talpyn degendi alǵa tartady. Men osy jerde myna bir jaqsy jumys týraly aıta ketsem deımin. Ol naqtylaı tússem, aldaǵy maýsymnyń 20-30 aralyǵynda Reseıdiń Ekaterınbýrg qalasynda alda aıtqan mono spektakldiń avtory Nıkolaı Kolıadanyń tikeleı uıymdastyrýymen «Kolıada-Plays» degen festıval ótedi. Oǵan alys jaqyn elderdiń 30-ǵa jýyq teatry qatysyp, ózderiniń ónerlerin jurt talqysyna salady. Biz de osy óner báıgesine at salysý nıetinde «Tasbaqa úmitin» úkilep qosqaly otyrmyz», deıdi qoıylymnyń rejısseri, Tuńǵysh Prezıdent – Elbasy qory syılyǵynyń laýreaty, akter Dáýren Serǵazın.
Aıta keterligi, bul psıhologııalyq dramany qazaq tiline aýdarǵan N.Saýdanbekuly bolsa, basty rólderdi sahnaǵa shyǵarǵandar, ıaǵnı Úmitti − Beıbit Qusanbaev, Armandy − Dáýren Serǵazın, Baqytty − Mádına Maı sózi men boıaýyn, kıim úlgilerin kelistire otyryp jurtshylyqqa usyndy. Taǵy bir eske sala ketetin ataýly is – basty keıipkerlerdiń atyn qazaqtyń ardaqty uǵymdaryna sáıkestendirip alýy der edik.
Aıman MUQYShEVA,
«Egemen Qazaqstan»
