7 mamyr kúni Dıego Maradona Birikken Arab Ámirligi chempıonatynyń ekinshi dıvızıonyndaǵy «Al-Fýdjaıra» komandasynyń bas bapkeri bolyp taǵaıyndalǵan bolatyn. Tanystyrý rásiminde argentınalyq maman Qazaqstannan, Reseıden usynys túskenin aıtty. Degenmen, bul bapkerlik qyzmet ekenin ashyp aıtpady.
«Men fýtboldy, stadıondardy qatty saǵyndym. Teledıdar aldynda otyryp kórýdi emes sol matchtyń ortasynda júrýdi armandaımyn. Komandany jattyqtyrýdyń qandaı ekendigin taǵy da sezingim keledi. Bul «Al-Fýdjaıra» komandasyna kelgenimdegi basty maqsatym bolatyn.
Qazir oıymnyń bári «Al-Fýdjaıra» komandasynda. Endigi bar emosııamdy, fızıkalyq jáne moraldyq kúshimdi osy jobaǵa arnaǵym keledi. Maǵan álemniń kóptegen elderinen usynys tústi. Olardyń arasynda Qazaqstan da, Reseı de boldy. Al agentim solardan eń úzdik usynysty iriktep aldy», dedi Maradona.
Esterińizge sala keteıik, Dıego Armando Maradona bas bapker retinde ózin osymen úshinshi ret synap kórmek. Osyǵan deıin ol 2008-2010 jyldar aralyǵynda Argentına ulttyq quramasyn, al 2011/12 maýsymynda Birikken Arab Ámirliginiń «Al Vasl» klýbtaryn jattyqtyrǵan.
Al fýtbolshy kezinde 1976-1997 jyldary Argentınanyń «Argentınos Hýnıors», «Boka Hýnıors», «Nıýs Old Boız», Ispanııanyń «Barselona», «Sevılıa» jáne Italııanyń «Napolı» komandalarynda oınaǵan. Argentına ulttyq quramasynyń sapynda 91 oıynǵa qatysyp, 34 goldyń avtory atandy. «Albıseleste» ujymymen 1986 jyly álem chempıony atansa, kelesi mýndıalda fınalǵa jetken.
56 jastaǵy maman Italııanyń eki dúrkin chempıony jáne «Napolı» tarıhyndaǵy úzdik surmergen atandy. Al 2000 jyly FIFA nusqasy boıynsha júz jyldyń úzdik oıynshysy ataǵyna ıe boldy.
