«Astana» zymyrady, «Aqtóbe» quldyrady

Kezdesýdiń 74-mınýtyna deıin 0:2 esebimen utylyp jatqan almatylyqtar aıaq astynan dúr silkinip, keremet kambekke qol jetkizdi. Iаǵnı, qýyp jetip, basyp ozdy. Jankúıer jazǵan «Bul «Qaırat» Islamhansyz oınaı almaıdy eken-aý», dep aýyz jıyp úlgergeninshe bolǵan joq, Kahaber Shadadzeniń Arshavın bastaǵan shákirtteri aınaldyrǵan bes mınýttyń ishinde topyrlatyp úsh gol saldy. Sóıtip, kapıtansyz oınasa da 3:2 esebimen jeńiske jetken «Qaırat» ázirge úshinshi orynyn saqtap qaldy. 
Al kósh basyndaǵy «Astana» Kerekýden kelgen «Ertistiń» shańyn qaǵyp aldy. Buǵan deıin eki birdeı oıynda teń túsken temir­jolshylar osy jeńisten keıin jaǵdaıyn táp-táýir túzep aldy. Olar bir oıynynyń kem­digine qaramastan, ózin ókshelep kele jatqan «Orda­basynan» tórt upaı uzap ketti. Al ońtústik­qazaq­standyqtar bolsa, bul týrda «Atyraýmen» teń túsip, mańyzdy degen eki upaıdan aıyrylyp qaldy.
Kósh sońyndaǵy «Shahter» úshin bul týr sátti ótip, komanda bıylǵy maýsymdaǵy ekinshi jeńisine qol jetkizdi. Keıingi kezdesýlerde mergendigimen kózge túsip júrgen Aıdos Táttibaev bul joly da gol soǵyp, komandasyna jeńis syılady. Shabýylshy salǵan jalǵyz dop oıyn taǵdyryn sheshken bolatyn. 
Fýtbolsúıer qaýymdy azýly klýb «Aqtóbeniń» jaǵdaıy alańdatyp otyr. Atalǵan ujym osy joly da ońbaı utyldy. «Tobyl» soqqan úsh golǵa alań ıeleri bir ǵana doppen jaýap bere aldy. 
On ekinshi týr «Taraz» úshin de oljaly boldy. Olar óz alańynda sońǵy týrlarda ala-qula oınap júrgen «Qaısardy» 2:1 esebimen utty. Kúni keshe ǵana kósh bastaǵan Syr boıynyń komandasy syrǵı-syrǵı, bul kúni týrnır kestesiniń týra belortasyna tústi.
«Oqjetpes» – «Qaırat» – 2:3 (1:0), Strýkov, 29 (1:0). Strýkov, 68 (2:0). Arshavın, 74 (2:1). Isael, 75 (2:2). Turysbek, 79 (2:3). «Shahter» – «Aqjaıyq» – 1:0 (0:0), Táttibaev, 83 (1:0). «Astana» – «Ertis» – 2:0 (1:0), Murtazaev, 13 (1:0). Jalmuqan, 79 (2:0). «Taraz» – «Qaısar» – 2:1 (0:1), Baıjanov, 45+1 (0:1). Dıarra, 70 (1:1). Taýbaı, 75 (2:1).  «Aqtóbe» – «Tobyl» – 1:3 (0:1), Shetkın, 41 (0:1). Malyı, 48 (0:2). Djalılov, 52 (0:3). Mamýte, 79 (1:3). «Atyraý» – «Ordabasy» – 2:2 (0:1), Nóserbaev, 14 (0:1). Abdrahmanov, 52 (1:1). Salomov, 59 (2:1). Nur­ǵalıev, 85 – penaltıden (2:2).
Surmergender arasyndaǵy básekede 9 golmen Jerar Goý («Qaırat») burynǵysha top bastap keledi. Odan keıingi oryndaǵy Alekseı Shetkın («Tobyl») men Jýnıor Qabananganyń («Astana») enshisinde 6 goldan bar. 
Kelesi, 13-shi týrdyń oıyndary 20 mamyrda ótedi. Bul kúni komandalar mynadaı jup qurap, ózara kim myqtyny anyqtaıdy:
«Aqjaıyq» – «Astana», «Er­tis» – «Atyraý», «Or­da­­­basy» – «Aqtóbe», «To­byl» – «Oqjetpes», «Qaı­­sar» – «Shahter», «Qaı­rat» – «Taraz».
Erteń, ıaǵnı 17 mamyr kúni 7-týrdyń keıinge qaldyrylǵan bir oıyny ótip, jasyl alań ústinde «Aqtóbe» men «Atyraý» kúsh synasady. 

Qaırat ÁBILDINOV,
«Egemen Qazaqstan»