Onyń ishinde dándi daqyldar 2,9 mıllıon gektar alqapty qurasa, maıly daqyldar kólemi – 712,2 myń gektar. Oblystyq aýyl sharýashylyǵy basqarmasynyń mamandary bergen málimetterge qaraǵanda, astyq óndirisin ártaraptandyrýǵa basa mańyz berilip, maıly daqyldar 200 myń, burshaq tuqymdas daqyldar 53 myń gektarǵa kóbeıgen. Bıyl qant qyzylshasy da ósiriledi. Qajetti 65 myń tonna dızel otynymen qamtamasyz etilgen.
Astyq tanaptaryn aralap shyqqan aımaq basshysy Qumar Aqsaqalov jaýapty naýqandy óz deńgeıinde atqarýǵa barlyq jaǵdaıdyń jasalǵanyn, sý tasqyny eshqandaı kedergi keltirmeıtinin atap kórsetti.
«Kókónisterdi kóbirek ósirýge basa kóńil bólip otyrmyz. Ońtústik jaqtardan tasymaldamaı, óz múmkindigimizdi tıimdi paıdalanýymyz kerek. Azyq-túliktiń jetkilikti qoryn qalyptastyrý aıryqsha baqylaýda tur. Ol úshin agroónerkásip salasyn damytýdyń tujyrymdamasyn jasaýǵa tapsyrma berildi. Rentabeldi daqyldar ósirýmen shuǵyldanýǵa betburys jasaıtyn bolamyz», dedi Qumar Irgebaıuly.
Búgingi kúni kóktemgi dala jumystaryna 30 myńǵa jýyq aýyl sharýashylyq tehnıkalary jumyldyrylyp, qyrdaǵy qarbalas keń óris alǵan. Shalǵaıdaǵy Ýálıhanov aýdany memlekettik qoldaýdyń arqasynda jylda bitik astyq ósirip keledi. Bıylǵy qulshynystary tipti joǵary. Alqaptarda ylǵal saqtaý, topyraqty óńdeý sharalary tyńǵylyqty júrgizilip, endi 265 myń gektar jerge dán sińirýge qyzý kirisip ketken. Sol sııaqty Qyzyljar aýdanynyń agrarshylary zamanaýı tehnologııalardy óndiriske engizý, tehnıkalardy jańartý esebinen mol ónim negizin qalap júr. О́tken jyldyń qorytyndysy boıynsha maıly daqyldar kólemi jóninen tórtinshi orynǵa taban tirese, bıyl alǵa birtaban jyljyǵany baıqalady. Al maıly daqyldar ishinde raps, zyǵyr, kúnbaǵysqa edáýir basymdyq berilgen.
«Bıyl 198 myń gektar alqapqa jazdyq daqyldar ornalastyrý josparlanǵan. Maıly daqyldar úsh myń gektarǵa ulǵaıtyldy. «Zenchenko jáne K» komandıttik seriktestigi alǵash ret qazaqstandyq jańa elıtaly sorttar ósirý tájirıbesin engizbekshi. «Esil» nesıelik seriktestik quramyna enetin sharýashylyqtarǵa mıneraldy tyńaıtqyshtar men pestısıdter, janar-jaǵarmaı materıaldaryn satyp alýǵa jeńildikter qarstyrylǵan. 32 qatysýshyǵa 519 mıllıon teńge nesıe berildi», deıdi Qyzyljar aýdandyq aýyl sharýashylyǵy bóliminiń basshysy О́mirbaı Omarov.
Sınoptıkterdiń boljaýynsha kóktemniń sońǵy aıy qubylmaly bolatyn túri bar. Osyny eskergen soltústikqazaqstandyq agrarshylardyń bar kúsh-jigeri men jınaqtalǵan mol tájirıbesi alqaptarǵa dán sińirý jumystaryn óz merziminde aıaqtap shyǵýǵa baǵyttalǵan.
О́mir Esqalı,
«Egemen Qazaqstan»
