Táýelsizdik saraıynda jyl saıyn otyzdan asa kórme uıymdastyrylady. Kórme balalar shyǵarmashylyǵynan eresekterdiń ónerine deıingi aralyqta túrli janrdy, túrli taqyryptardy qamtıdy. Muhtardyń shyǵarmashylyǵyna arnalǵan kórmeniń de ózindik ereksheligi bar. О́z tilimen aıtqanda, «án-kúı ozattaryna izet» kórsetý arqyly qazaq dalasynda ár kezeńde ómir súrgen ónerpazdardyń tutas galereıasyn jasap, ony kórermenderge úılesimdilikpen usyna bilgen. Aqan seri, Birjan sal, Jaıaý Musa, Úkili Ybyraı, Muhıt Meralyuly, Kenen Ázirbaev, Maıra Ýálıqyzy, Dına Nurpeıisova qatarly jıyrmadan asa bulbul men dúldúldiń portretterin kenepke salǵan sýretshi dala ónerpazdarynyń iri, kesek tulǵalaryn beınelegen. Maıly boıaýmen salynǵan ár tulǵanyń ózine tán qaıtalanbas minez-qulqy «menmundalaıdy», al ónerpazdyń artqy jaǵynda sol kezdiń áleýmettik ómirinen alynǵan sıýjetter kóz tartady. Jalpy, kórmege portretterden bólek elimizdiń landshafttary beınelengen 20 shaqty sýret qoıylǵan.
Táýelsizdik saraıynyń Kórme uıymdastyrý bóliminiń jetekshisi Aınur Abýlqaıyrovanyń aıtýynsha, shyn mánindegi shyǵarmashylyq ıelerine, Táýelsizdik saraıyndaǵy ózi qyzmet etetin bólimniń esigi qashanda ashyq. Munda tek qana otandyq shyǵarmashylyq ıeleri ǵana emes, shet elderden de kelip, kórme uıymdastyratyn óner adamdary bar. Onyń ber jaǵynda túrli qaıyrymdylyq sharalary da kóptep uıymdastyrylady. Biraq, is-sharanyń qaı-qaısysy bolsyn saraıdyń negizgi tujyrymdamalaryna sáıkes kelýi kerek. Mazmuny men maǵynasy tereń bolmaǵy shart. Osy turǵydan alǵanda bólim jetekshisiniń pikirinshe, Muhtar Baıbosynovtyń óner adamdaryna arnap salǵan portretter serııasy kórermenniń sanasyn rýhanı turǵydan jańǵyrtyp elimizdiń naǵyz aıtýly óner ıeleriniń beınelerin jadynda saqtaýǵa septigin tıgizbek.
Aıgúl SEIILOVA,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
