Áıel kásipkerlerdiń kezekti toǵysýynda osy baǵdarlamanyń naqty nátıjeleri sóz boldy. Jáne atalmysh Bank qazaqstandyq kásipker áıelderdi qoldaýyn jalǵastyratynyn málimdep otyr.
О́z kezeginde búginge deıin Qazaqstan Úkimeti «Bıznestegi arýlar» baǵdarlamasyna 8,2 mıllıon AQSh dollary kóleminde qarjy bólgen.
Qalaı desek te, Ortalyq Azııadaǵy alǵashqy baǵdarlama kásipker arýlarǵa qarjylyq quraldar men bıznestegi noý-haýdy qoljetimdi etýdi kózdeıdi. Degenmen, bul bastamanyń áıel kásipkerlerge bergen naqty kómegi qandaı? Osy saýaldardyń tóńiregindegi konferensııaǵa Ulttyq ekonomıka mınıstrligi, «Damý» kásipkerlikti damytý qory» AQ, áriptes qarjylyq ınstıtýttar jáne Túrkııa, Kanadadan sarapshylar qatysty.
Baǵdarlama áriptes qarjylyq ınstıtýttarǵa nesıe jáne nesıelik táýekelderdi basqarýdy jáne shaǵyn jáne orta bıznespen aınalysqanda kepildendirý ádisterin jaqsartý, tıimdilikti baǵalaý jáne esepteý ádisterin jaqsartý, nesıe menedjerlerin ShOB-men jumys isteýdi úıretý sekildi tehnıkalyq qoldaý kórsetedi. Qarjymen qosa EQDB tikeleı shaǵyn jáne orta bızneske básekelestikti arttyrýǵa baǵyttalǵan zamanaýı basqarý tájirıbesin jáne tehnologııasyn engizýge noý-haý alýǵa múmkindik beredi.
Baǵdarlama iske qosylǵaly beri EQDB 88 keńes berý jobasyn júzege asyrǵan. Jáne EQDB-dan 4 áriptes-qarjylyq ınstıtýt kásipker arýlardy qarjylandyrýǵa ulttyq valıýta teńgemen 45 mıllıon AQSh dollary kóleminde nesıege qol jetkizgen. Iаǵnı BankSentrKredıt 20 mıllıon AQSh dollaryn, Shınhan Bank Kazahstan 5 mıllıon AQSh dollaryn, MFO KMF 10 mıllıon AQSh dollaryn, ForteBank Qazaqstan 10 mıllıon AQSh dollaryn alǵan. Oǵan qosa áriptes-qarjylyq ınstıtýttardyń nesıe menedjerleri men menedjmenti baǵdarlama talaptary, qarjylyq emes qyzmetter men «Bıznes aınasy» atty bıznestiń onlaın dıagnostıka quraly týraly arnaıy semınarlarǵa qatysqan.
Jáne EQDB kásipker arýlarǵa «Is-árekettegi basshylyq», «Marketıngtegi sandyq tehnologııalar», «Qarjy menedjmentiniń kilti», «Kásipkerden kásiporynǵa deıin» atty semınarlar uıymdastyrǵan. Bıyl aqpan aıynda «Qazaqstannyń kásipker arýlaryna arnalǵan tálimgerlik» baǵdarlamasy iske qosylǵan. Tálimger retinde Qazaqstanda bıznes júrgizýde aıtarlyqtaı tájirıbe, bedeli bar 28 jetekshi kásipker tańdalynyp alynǵan. Saýalnamaǵa qatysýshylardyń 86 paıyzy baǵdarlama ábden kóńilinen shyqqanyn bildirip, 76 paıyzy tálimgerleriniń joǵary biliktiligin atap ótken.
Eýropalyq qaıta qurý jáne damý bankiniń Qazaqstandaǵy dırektory Agrıs Preımanıs pikirine qaraǵanda, qarjylyq ınstıtýttyń «Bıznestegi arýlar» baǵdarlamasyn atqarýǵa Qazaqstan úkimetiniń qoldaýy ıgi yqpal etýde.
Aınash ESALI,
«Egemen Qazaqstan».
ALMATY
