Aýdan ákimi Vladımır Dýdovtyń aıtýynsha, oblystyq ákimdiktiń qorynan tabıǵı apattyń zalalyn óteý úshin 53,5 mıllıon teńge bólingen. Budan tysqary kómek qoryna 19 mıllıon bıýdjetten tys qarjy túsken.
Sý tasqyny kezinde Rýzaevka bul eldi mekeninde 12 úı jaramsyz bolyp qalǵan. Olardyń ıelerine bıýdjettik jáne bıýdjetten tys qarjy esebinen baspanalar men páterler satyp alyp berildi. Tótennen tóngen oqıǵa kezinde Elvıra Seralına qujattaryn ǵana alyp úlgergen, dúnıe-múlkin sý aǵyzyp áketken. Endi jańa úıdiń kilti tabys etildi.
«Úıimiz úlken, keń, ári barlyq jaǵdaı jasalǵan: kólikjaı, monsha, baqsha bar. Úıdiń burynǵy ıesi bizge barlyq jıhazdar men tehnıkany qaldyryp ketti. Bizge qolushyn sozǵan barlyq adamdarǵa alǵys aıtamyz», - deıdi Seralınder otbasy. Lılııa Afanaseva da jańa páterde qonys toıyn toılady. Jalǵyzilikti áıelge bir bólmeli páter tıdi.
Al, qaıyrymdylyq is-sharalardan jınalǵan 9 mıllıon teńge azyq-túlik, kıim-keshek, aıaq-kıim, qurylys materıaldary, turmystyq tehnıka satyp alýǵa jumsaldy. Rýzaevka aýyldyq okrýginiń ákimi Igor Kobıalkonyń aıtýynsha, aýylda 88 otbasy qıyn jaǵdaıǵa tap bolǵan.
Ǵ.Músirepov atyndaǵy aýdanda sý tasqyny kezinde 120 úıdi sý shaıyp ketken.
О́mir Esqalı.
«Egemen Qazaqstan».
