Oral qalasy prokýratýrasy 2017 jyldyń 4 aıyna taldaý jasap, «qalalyq jerde urlanatyn árbir úshinshi zat – uıaly telefon eken» degen tujyrymǵa kelgen. Oralda jyl basynan beri osyndaı 486 urlyq tirkelipti. «О́tken jylǵymen salystyrǵanda mundaı urlyq sany sál azaıǵanymen, telefon men kompıýterlik tehnıka urlyǵy proporsıonaldy túrde ulǵaıyp keledi», dep habarlady Batys Qazaqstan oblystyq prokýratýrasynyń baspasóz qyzmeti.
Bir ókinishtisi, mundaı urlyqtyń kóbi ashylmaı qalady. Joǵaryda aıtylǵan urlyq oqıǵalarynyń 22%-y ǵana ashylǵan.
«Saqtansań – saqtaımyn» degen naqyldy eskerip, uıaly telefon kóbinese qaı jerde, qaı ýaqytta, qalaı urlanatynynan habardar bolyńyz. Tómendegi sıfrlar Oral qalasyndaǵy bıylǵy 4 aıdyń derekteri:
157 telefon – qoǵamdyq orynda, 72 telefon – páter, úı-jaı, jataqhanalarda, 64 telefon – saýda-sattyq oryndarynda, 32 telefon – túngi klýbtar men meıramhanalarda; 17-si – avtokólikte, 9-y – oqý oryndarynda, 5 telefon medısınalyq mekemelerde urlanǵan.
58 telefondy úıge kelgen qonaq urlapty. Oraldaǵy páter urlyǵynyń árbir besinshisi – dál osy uıaly telefon urlaýmen baılanysty.
Qaltafondardyń 32,3%-y qoǵamdyq kólikte qoldy bolady eken. Urlanǵan uıaly telefondardyń 69%-y jábirlenýshilerdiń qaltasynan urlanǵan. 17 telefon avtokólikten urlanǵan, onyń 8-inde kóliktiń esigi kilttenbegen eken.
Qoǵamdyq kólikte uıaly telefon urlyǵy jumys kúnderi, avtobýs salonynda adam kóp kezde, ıaǵnı tańerteńgi 8.00 men 10.00 aralyǵynda, keshki 16.00 men 20.00 aralyǵynda jasalǵan.
Urlanǵan telefondardyń 169-ynyń quny 50 myń teńgege deıin, 199-y 50 myń teńgeden 100 myń teńgege deıin, al 100-i 100 myń teńgeden joǵary bolypty.
Telefon urlatqandardyń 66,6%-y (324 oqıǵa) áıel adam eken. Odan keıingi orynda – mektep oqýshylary. Urylar tepse temir úzetin er adamnan aınalyp ótetin syńaıly.
Joǵarydaǵy málimetterdi ortaǵa salǵan Oral qalasynyń prokýrory A.Rashıdov jergilikti atqarýshy jáne quqyq qorǵaý organdary basshylaryn, uıaly operatorlar ókilderi men telefon satý, aıyrbastaýmen shuǵyldanatyn saýda núkteleri ıelerin qaltafon urlyǵyn toqtatý, aldyn alý úshin birlese jumys isteýge shaqyryp otyr.
Qazbek QUTTYMURATULY,
«Egemen Qazaqstan»
ORAL
