Qytaıdyń Úrimji qalasyndaǵy «Abaı joly» kompanııasy túsirip jatqan «Abaıdyń balalyq shaǵy» atty 3D kópserııaly anımasııalyq fılmi Abaı álemi aıasyndaǵy izdenisterdiń keńge qanat jaıyp kele jatqandyǵyn ańǵartady.
– Qazir tórt serııanyń túsirilim jumystary sátti aıaqtaldy. Úgit-nasıhat esebindegi alǵashqy serııasynyń uzaqtyǵy 15 mınýt, keıingi serııalary 13 mınýttan turady. Fılmniń 26 serııasyn bir jyl kóleminde túsirip bitirýge tıispiz. Jumys sátti bolyp, teleanalardan kórsete alsaq, tolyqmetrajdy mýltfılm etý oıymyzda bar, – deıdi kompanııa dırektory, ári mýltfılm rejısseri Ǵusman Qajytaı.
Mýltfılm sıýjetinde Abaı obrazy halyq uǵymyna ortaq aqyldy, zerek, qazaqtyń qara domalaq balasy retinde beınelengen. Biraq fılm rejısseri «bul Abaı beınesiniń túbegeıli obrazdyq sheshimi emes» dep otyr. – Bala Abaıdyń bitim-bolmysyn, beınesin sýretteýde uzaq oılandyq. Biz jalpy qazaq kóńilinen, álem kóńilinen shyǵatyn obrazdyq nusqany jasaǵymyz keledi. Sondyqtan bala Abaıdyń beınesin tolyqtyrý maqsatynda bolashaqta ózgerister engizýimiz múmkin, – degen ol bas personaj beınesine qatysty el arasynan usynys, syn-pikirler bolsa ǵanıbet deıdi.
Mıftik ańyz-áńgimelerdi arqaý ete otyryp, Abaı dúnıege keler shaqtaǵy aq pen qaranyń aıqasy kórsetiledi, sonymen birge Abyz, Mystan sııaqty dástúrli ertegi keıipkerleri de nazardan tys qalmaǵan. Qazaqtyń bala tárbıesindegi ónegesi, jan-janýarlar álemine qurmet kórsetý tárizdi izgilikke shaqyrady. Abaıdyń týǵan-týysqanyńa, dos-jaranyńa ǵana emes, tipti «dushpanyńa da ádil bol» degen gýmanıstik ıdeıasy endi anımasııa tilinde sóıleıdi.
– Ssenarııdi jazýda Qazaqstannyń, Qytaıdyń tájirıbeli mamandarymen birlesip jumys istedik. Abaı obrazyn beıneleýde dúnıege kelgen kezi, apyl-tapyl qaz basqan shaǵy, 7-8 jasar bala Abaıdyń ájesi men anasynyń aqyly arqyly qıynshylyqty eńserýi sııaqty kórinisterdi qamtydyq. Odan bólek Abaı týǵan aýyldy sýretteýmen ǵana shektelmeı, qazaq atyrabynyń kóz tartar kórkem jerlerin beıneleýdi maqsat ettik. Fılmde qazaq dalasynyń ár alýan tabıǵaty kórinedi, – degen Ǵusman Qajytaı osy arqyly Qazaqstanǵa týrısterdi tartýǵa bolatynyn da aıtady.
Mýltfılmniń túsirý jumystaryna Qytaıdaǵy «Az ulttardyń mádenıetin qorǵaý jáne qoldaý» saıasaty aıasynda memleket qarjylaı kómektesken kórinedi.
– Jaqynda Qytaıdyń CCTV telearnasynyń jańalyqtary bizdiń kompanııanyń jumysy týraly 5 mınýttyq habar jasady. Onda «Abaı – qazaq halqynyń Konfýsııi» dep tanystyryldy. Bul – úlken moıyndaý, ári bizdiń shaǵyn kompanııamyz úshin jetistik. Ázirge demeýshi izdemedik. Aldymen sapaly anımasııalyq fılmdi túsire alatynymyzdy dáleldegimiz keledi. Mýltfılmniń alǵashqy serııalaryn EKSPO kezinde Qazaqstandaǵy telearnalardan kórsetsek degen nıetimiz bar. Bul bizdiń halyqaralyq kórmege daıyndaǵan úlken syıymyz bolar edi, – deıdi kompanııa dırektory.
Uly Abaıdyń balalyq shaǵy halyq folklory negizinde sýrettelýi shyǵarmanyń ishki órnegin baıyta túspek. Osylaısha, Qytaıdaǵy qandastarymyz bala Abaıdyń ósken ortasyn búgingi jas urpaqqa mýltıplıkasııalyq fılm arqyly kórkem túrde jetkizip, baldyrǵandardy Abaı tálimine baýlymaqshy.
Aıa О́MIRTAI,
«Egemen Qazaqstan»
