Konferensııa Jýrnalıstıka jáne saıasattaný fakýlteti oqý ǵımaratynyń 112-aýdıtorııasynda (Astana qalasy, Iаnýshkevıch kóshesi, 6 úı) ótedi. Bastalýy saǵat 11:00-de.
Qazaq jýrnalıstıkasy tarıhynda tuńǵysh ret atalyp ótiletin maqala jarııalanýynyń 100 jyldyq mereıtoıyna arnalǵan ǵylymı-tájirıbelik semınarǵa kórnekti qoǵam qaıratkerleri, memlekettik syılyqtyń ıegerleri, alashtanýshy-ǵalymdar, ult zııalylary, «Bostandyq» mektebiniń basshylary men túlekteri jáne ýnıversıtet professor-oqytýshylary men bilim alýshylary qatysady.
Jarııalanǵanyna 100 tolǵan maqalanyń avtory Álmuhammed Ospanuly – aǵartýshy, aqyn ári jýrnalıst. Ol 1886 jyly Torǵaı ýezi, Tosyn bolysynyń 4-shi aýylyna qarasty «Bestaý», «Sýyqbulaq» manzalyndaǵy «Sasyqsor» qystaýynda dúnıege kelgen. 12 jasyna deıin aýyl mollasynan oqyp, saýatyn ashady, 13 jasynda Torǵaı qalasyndaǵy 4-klastyq orys qolóner mektebine túsip, «aǵash ustasy» degen mamandyq alyp shyǵady. Sodan keıin 17 jasynda osy Torǵaı qalasyndaǵy 6 jyldyq orys mektebiniń 4-klasyna qabyldanyp, ony 1905 jyly bitiredi. 1911 jyly Troısk qalasyndaǵy Zeınolla ıshan saldyrǵan «Rasýlııa» mediresesine túsip, dáris alady. Oqı júrip, osy qalada uly aǵartýshy Muhamedjan Seralın ashqan qazaqtyń tuńǵysh jýrnaly «Aıqaptyń» jumysyna aralasady, munda Álmuhammedtiń «Qazaǵyma» degen óleńi, basqa da shyǵarmalary basylady. «Rasýlııany» 1916 jyly bitirip, Torǵaıǵa oralady. 1917 jyly Keńes ókimeti ornaǵanan keıin týǵan jeri – «Bestaý», «Sýyqbulaq», «Shıli» mańyndaǵy «Úshqarasý» basyndaǵy meshitti «Bostandyq» mektebi dep atap, aýyl balalaryna oryssha-qazaqsha bilim bere bastaıdy.
"Bostandyq" mektebinde kórnekti aqyn Qaınekeı Jarmaǵambetov, memleket jáne qoǵam qaıratkeri Smaǵul Muqanov, shejireshi Ahmetqan Ábiqaev saýat ashty, Uly Otan soǵysynan keıingi jyldarǵy mektep túlekteri otandyq ǵylym men bilimdi, ádebıet pen ónerdi damytýǵa súbeli úles qosty.
1920 jyly Orynbordaǵy aǵartý bólimi meshitti qazaq tilindegi bastaýysh mektepke aınaldyryp, osynda úsh aılyq kýrs uıymdastyrady, Torǵaı ýezi boıynsha osy «Bostandyq» mektebinen 75 adam muǵalimdik kýálik alyp shyǵady. Álmuhammed sol kýrsta A. Baıtursynulynyń emlesin alǵashqylardyń biri bolyp qoldanyp, sabaq beredi. 1923 jyly Aqtóbe qalasynda ashylǵan muǵalimder kýrsynda bilimin odan ári jetildirip, «Bostandyq» mektebiniń meńgerýshisi bolyp taǵaıyndalady. Sonymen qatar gýbernııalyq basqarmaǵa ótinish berip, «Úshqarasý», «Shıli» basynan kooperasııa ashyp, ony bir jyl ózi basqarady.
Al, 1925 jyldyń aıaǵynda Torǵaı qalasynda úlken dinı jınalys bolyp, sol májiliste jalpy halyq Álmuhammed Ospanulyn biraýyzdan muhtasıf etip saılaıdy. 1926 jyly Ýfa mýftıiniń shaqyrýymen baryp, muhtasıftik jarlyǵyn alady. 1929 jylǵa deıin Torǵaı qalasynyń ortalyǵynda muhtasıftik qyzmet atqarady. Sol kezde Álmuhammed Ospanulynyń qaraýynda 54 meshit bolǵan. 1929 jyly Álmuhammed «muhtasıf boldy» degen jalamen 10 jylǵa sottalady. Biraq túrmede jatyp izdenýdiń nátıjesinde 1930 jyly bosatylady. 1931 jyly qaıta qýdalanyp, taǵy da 10 jylǵa sottalyp, Qostanaıdyń túrmesinen bir-aq shyǵady. 1934 jyly merzimi bitken soń týǵan aýyly «Shılige» qaıta oralady. 1935 jyly qaıtadan «Bostandyq» mektebinde muǵalim bolady. Bala oqytýmen qatar «Shıliden» bóget saldyrady.
1937 jylǵy zobalań bastalǵanda, Álmuhammed Ospanuly «aýrýdyń aldyn alyp», Troıskige kóship keledi. 1939 jyly Qostanaı oblysynyń Komsomol (burynǵy Qarabalyq) aýdanyndaǵy «Maǵynaı» mektebiniń ınternatynda meńgerýshi bolyp isteıdi. Al, 1940-1941 oqý jylynda «Bozkól» mektebinde orys balalaryna qazaq tilinen sabaq beredi. Osynda júrgeninde «halyq jaýy» retinde ustalyp, úshinshi ret túrmege otyrady. 1948 jyly bosap shyǵyp, Paıǵambar jasyna kelgende elge oralyp, jurtshylyqty ımandylyqqa úndeıdi. Álmuhammed Ospanuly týǵan jeri «Shılide» 1966 jyldyń 18 shildesi kúni týra 80 jasynda qaıtys bolady.
