Q. Toqaev meımanmen kezdesýde Prezıdent Nursultan Nazarbaevtyń 2016 jylǵy qazandaǵy Er-Rııadqa sapary ekijaqty qatynastardyń qarqyndy sıpatyna jańa serpin bergenin atap ótti. Tóraǵa meımanǵa Qazaqstan saıası júıesindegi Senattyń róli týraly áńgimelep berdi.
Júzdesýge qatysýshylar Sırııadaǵy jaǵdaı jóninde pikir almasty. Q.Toqaev atap ótkendeı, jalǵasyn tapqan Astana prosesteri Sırııadaǵy shıelenisti beıbit retteýge eleýli úles qosýda.
Senat tóraǵasy Saýd Arabııasy Koroliniń keńesshisine Álemdik jáne dástúrli dinder lıderleri Sezi Hatshylyǵynyń taıaýda ótken otyrysynyń qorytyndylary týraly habardar etti.
«Biz álemdik dinder basshylary men kórnekti saıasatkerlerdi bir-birin tyńdaı alýy ári túsine alý úshin bir ústel basyna jınadyq», – dedi Q.Toqaev. Tóraǵa Venada ornalasqan Korol Abdalla ben Abdel-Azız atyndaǵy Dinaralyq jáne mádenıetaralyq únqatysýdyń halyqaralyq ortalyǵymen baılanysty jalǵastyrý mańyzdy ekenin atap ótti.
