«Lagerlerdiń jazǵy demalys maýsymyna daıyndyǵyn kórý úshin oblystyq bilim berý basqarmasynyń mamandary 14 lagerdiń barlyǵynda bolyp, olardyń jumysyn kózimen kórip keldi. Lagerlerdiń barlyǵynda jóndeý, tóńirekti sanıtarlyq tazalaý jumystary júrip jatyr.Tek aýyz sý máselesi ǵana jarym-jartylaı sheshimin tappaı tur. On tórt lagerdiń beseýinde aýyz sý tasyp jetkiziletin bolady», dedi oblystyq bilim berý basqarmasynyń basshysy Bátıma Daýymova.
Jaz maýsymynda osy 14 lagerde 11 000 bala tabıǵat aıasynda demalatyn bolady. Altynsarın aýdanyndaǵy «Mereı» jáne Arqalyq qalasyna qarasty «Stroıtel» balalar jeke menshik demalys lagerleri joǵary dárejede jabdyqtalǵan. «Mereı» bir aýysymda 650 bala qabyldap, jaz boıy 4500 balany saýyqtyrady. Lagerde tynys alý organdary aýyratyn balalardyń em qabyldaýyna barlyq jaǵdaı jasalǵan.
Batıma Daýymovanyń aıtýynsha, sanıtarlyq-epıdemıologııalyq stansa men tótenshe jaǵdaılar departamentiniń ruqsat qaǵazynsyz birde bir lager jumysyn bastamaıdy. Sonymen qatar, oblysta kanıkýl kezinde 113 demalys alańy jáne 250 palatkalyq lageri jumys isteıdi. Balalar tek demalyp ǵana qoımaı, sportpen shuǵyldanady, til úırenedi, ekologııalyq bilim alady. Osylaı bolsa da, oblysta jyl saıyn balalardyń jazǵy demalysyn uıymdastyrýda aıqyn ózgerister joq. Mektep oqýshylarynyń tek 10-11 paıyzy ǵana tabıǵat aıasynda demalýǵa múmkindik alady.
Názıra Járimbetova,
«Egemen Qazaqstan»
