Almaty qalasynyń ákimi Baýyrjan Baıbek quttyqtaý sózinde Qazaqstan Prezıdenti Nursultan Nazarbaevtyń «Egemen Qazaqstan» gazetindegi jarııalanǵan «Bolashaqqa baǵdar: rýhanı jańǵyrý» maqalasynda mádenıet pen jeke ulttyq kodty saqtaýǵa úlken nazar aýdarǵanyn aıta kelip, tek sońǵy eki jyl ishinde ǵana Almatyda 5 aıtys, sonymen qatar aqyndardyń «Altyn dombyra» festıvali ótip, dástúrli mýzykanyń «Alataý» mýltımedııalyq jáne qolónershilerdiń jańa ortalyǵy, Almaty qalasynyń myńjyldyq tarıhı murajaıy ashylǵanyn da tilge tıek etti.
Búgingi tańda qala turǵyndary men qonaqtary Almatyda jaılasqan osynaý mádenıet pen óner otaýlary arqyly qazaq halqynyń ejelgi dástúr-salttarymen burynǵydan da keńinen tanysa alady.
«Memleket basshysy elimiz táýelsizdikke qol jetkizgen kúnnen bastap tól qundylyqtarymyzdy nasıhattaý arqyly ulttyq sanany jańǵyrtýdy basym baǵyt retinde aıqyndap berdi. Sonyń arqasynda halqymyz umyt bola bastaǵan tilimen, ózindik mádenıetimen, salt-dástúrimen qaıta qaýyshty, –degen qala ákimi sózin bylaı jalǵady. – Memleket tarapynan ulttyq sport túrlerine, onyń ishinde kókpar, alaman báıge, aýdaryspaq, teńge ilý, jamby atý, asyq atý, toǵyzqumalaq, qazaq kúresi syndy aıshyqty is-sharalarǵa júıeli túrde qoldaý kórsetilip keledi. Osy jyldyń aıaǵyna deıin Almaty ıppodromynda júldelik qory 80 mln teńgeni quraıtyn 89 báıge ótedi. Almatyda «Almaty Barysy» men «Álem Barysy» saıystarynyń ótýi de sport áýesqoılary jáne jalpy halqymyz úshin erekshe syı bolmaq.
О́z kezeginde QR ulttyq sport túrleri qaýymdastyǵynyń prezıdenti Bekbolat Tileýhan Almatynyń elimizdiń ulttyq sport túrleri boıynsha saıystar jıi ótetin elimizdiń sporttyq jáne rýhanı ortalyǵyna aınalǵanyna toqtaldy.
«Ulttyq sport – ata-babalarymyzdan qalǵan ári barsha álemge maqtanyshpen kórsete alatyn bizdiń asyl muramyz. Sońǵy jyldary qazaqtyń ulttyq sport túrleri tek Qazaqstanda ǵana emes, shetelde de qarqyndy damyp, elimizdiń abyroı-bedelin arttyra túsýde. Onyń jarqyn mysaly, «EKSPO-2017» aıasynda kókpardan ótetin álem chempıonaty der edim», dedi Bekbolat Tileýhan.
Almatyda ótip jatqan «Uly dala oıyndary» respýblıkalyq festıvaline qatysýshylar sporttyń 12 túri boıynsha saıysqa túsedi, olardyń ishinde, 4 shaqyrymdyq taı jarys, 7 shaqyrymdyq qunan báıge, 13 shaqyrymdyq top báıge, jaıdaq báıgeler, 21 shaqyrymdyq alaman báıge, kókpar, aýdaryspaq, teńge ilý, toǵyzqumalaq, asyq atý, jamby atý, qazaq kúresi sııaqty ulttyq sport túrleri bar. Bıylǵy júldelik qor 24 mln teńgeni quraıdy.
Negizgi oıyndarmen qatar, festıval qonaqtary ańshylyq-saıatshylyq ónerge qatysty búrkittiń, tazy ıttiń on san túrimen tanysady. Qolóner sheberleri daıyndaǵan turmystyq buıymdardyń kórmesin tamashalaıdy. Eske salar taǵy bir jaıt – ótken ǵasyrdyń 1930 jyly negizi qalanǵan Almaty ıppodromynda «Uly dala oıyndary» festıval osymen qatarynan ekinshi márte ótýde.
Talǵat SÚIINBAI,
«Egemen Qazaqstan»
