Halyqaralyq forýmnyń ashylý saltanatynda Densaýlyq saqtaý basqarmasynyń basshysy M.Egizbaev qatysýshylardyń tájirıbe almasý jumystaryna sáttilik tiledi.
– Densaýlyq saqtaý basqarmasy jáne Qazaq onkologııa jáne radıologııa ǵylymı zertteý ınstıtýty onkolog-dárigerlerdiń biliktiligin arttyrýda úlken jumystar júrgizýde. Mundaı halyqaralyq tájirıbe almasýlar Shymkentte birinshi ret ótkizilip jatqan joq. Buǵan deıin Ońtústik Qazaqstanǵa medısınasy ozyq álem elderi Ońtústik Koreıa, Fransııa, Túrkııa, Mońǵolııanyń úzdik mamandary kelip, tájirıbelerimen bólisken. Nátıjesinde bizdiń dárigerlerimiz de óz betinshe kúrdeli otalar jasaýǵa qol jetkizdi. Bul maqsatta Reseıdiń jáne elimizdiń úzdik dárigerlerinen de úırenerimiz az emes, – dedi basqarma basshysy.
Onkoýrologııalyq forýmnyń maqsaty – erte dıagnostıkalaýdy jaqsartyp, naýqastarǵa kompleksti em júrgizip, ómirin uzartý. Qazirgi tańda búkil álem boıynsha qýyq asty beziniń qaterli isigine shaldyqqandar qatary kóbeıip keledi. Ońtústik Qazaqstan oblysynda jyl saıyn qýyq asty beziniń qaterli isigimen 60-tan asa jańa naýqas anyqtalady. Al, atalyq beziniń qaterli isigimen 40-qa jýyq jańa naýqas anyqtalady. Biraq bulardyń 60 paıyzy derttiń III-IV satysynda tabylady. Bul másele nesep-jynys jýıesiniń obyryn erte anyqtaýda Alǵashqy medısınalyq-sanıtarlyq kómek dárigerleriniń ýrolog jáne onkolog mamandarymen birlese jumys isteýdiń mańyzdylyǵyn kórsetedi.
Halyqaralyq sharaǵa Reseıdiń P.A.Gersen atyndaǵy Máskeý qalasynyń Ǵylymı-zertteý onkologııalyq ınstıtýtynyń aǵa ǵylymı qyzmetkeri, medısına ǵylymdarynyń kandıdaty K.Nıýshko, Reseı onkoýrologtar qaýymdastyǵynyń vıse-prezıdenti, medısına ǵylymdarynyń doktory, professor, I.Rýsakov, Qazaq onkologııa jáne radıologııa ǵylymı zertteý ınstıtýtynyń onkoýrologııa ortalyǵynyń basshysy, Qazaqstan Respýblıkasynyń shtattan tys bas onkoýrology, medısına ǵylymdarynyń kandıdaty N.Nurǵalıev, Qazaqstan-Reseı medısına ýnıversıtetiniń onkologııa jáne mammologııa kafedrasynyń meńgerýshisi, medısına ǵylymdarynyń doktory S.Esentaeva arnaıy shaqyrtyldy. Master-klass barysynda alǵashqy medısınalyq-sanıtarlyq kómek dárigerlerine qýyq asty bezi qaterli isiginiń erte dıagnostıkasyn jaqsartý boıynsha leksııa oqylyp, praktıkalyq tájirıbe kórsetildi. Qýyq asty beziniń qaterli isigine ota jasalyp, onkoýrologııalyq forýmda qýyqtyń jáne atalyq beziniń qaterli isikterin erte dıagnostıkalaý jáne emdeý tásilderi talqylandy.
