Dúıim dúnıeniń nazaryn aýdaryp otyrǵan kórmege elimizdiń árbir aımaǵy da ózindik ereksheligine saı mádenı-rýhanı turǵydan atsalysyp otyr. Al Uly Jibek joly boıynda ornalasqan, eki myń jyldan astam tarıhy bar kóne Taraz shahary kezinde kerýen toqtaǵan, saýda men ónerkásip órkendegen ólkelerdiń biri bolǵany belgili. Tarıhı tamyry tereń Taraz shahary kóne úrdisti qaıta jańǵyrtyp, aıtýly kórmege kerýen attandyrdy.
Búgin Taraz qalasyndaǵy «Kóne Taraz» tarıhı-mádenı ortalyǵyndaǵy Jambyl Jabaev eskertkishi alańynan «Uly Jibek joly. Kóne Tarazdan asqaq Astanaǵa tartý» atty kerýen saltanatty túrde Astana qalasyna jol tartty. Kórmege barar kerýendi oblys ákimi Kárim Kókirekbaev bastaǵan jambyldyqtar shyǵaryp saldy.
EKSPO-2017 halyqaralyq mamandandyrylǵan kórmesi aıasynda uıymdastyrylǵan kerýen quramynda 20 túıe, 46 at, 6 at arba, 10 júk avtokóligi, 3 avtobýs, uıymdastyrýshylar, ishki ister, jedel járdem, tótenshe jaǵdaı salalarynyń qyzmetkerleri qamtylǵan 6 qyzmettik avtokólik bar. Sondaı-aq, jıyny 150 adam atalǵan kerýenmen birge jolǵa shyqty.
Jospar boıynsha, kerýen Astana qalasyna jetkenshe Jambyl jáne Qaraǵandy oblystaryndaǵy jol boıynda ornalasqan 10 eldi mekenge toqtaıdy. Árbir toqtaıtyn jerde EKSPO-2017 kórmesin nasıhattaýǵa baǵyttalǵan is-sharalar uıymdastyrylady. Sondaı-aq, kıiz úıler tigilip, qazaq halqynyń turmys-tirshiligi, salt-dástúrleri sahnalanady jáne ulttyq sport oıyndary men konserttik baǵdarlamalar ótkiziletin bolady. Al Taraz jerinen Astanaǵa jol tartqan kerýen birneshe kún júrip otyryp, aıtýly kórme kezeńinde Elordaǵa jetedi dep josparlanǵan.
Sonymen qatar, 26-30 shilde aralyǵynda EKSPO-2017 halyqaralyq kórmesi aıasynda Astana qalasynda Jambyl oblysynyń mádenıet kúnderi ótedi. Áýeli áýlıeatalyqtar EKSPO aýmaǵyndaǵy «Amfıteatrda» mádenı-kópshilik is-sharalaryn ótkizse, keıingi kúnderi «Qazanat» qalalyq ıppodromynyń aýmaǵynda salynatyn «Etnoaýylda» is-sharalar uıymdastyrady. Munda kúni boıy sheberler aýyly, sheberlerdiń týyndylaryn satýǵa arnalǵan «Shyǵys bazary» oryn alsa, teatrlandyrylǵan qoıylymdar, konsertter men ulttyq sport oıyndary ótedi.
Uly Jibek joly týraly derekter Qytaı ǵalymdarynan bastap áıgili oqymystylardyń jazbalarynan álemge belgili. Al kórme aıasynda sheteldik qonaqtar ejelgi Taraz qalasynyń tarıhymen tanysyp qana qoımaı, arnaıy uıymdastyrylǵan «Uly Jibek joly. Kóne Tarazdan asqaq Astanaǵa tartý» atty kerýenge de kýá bola alady.
Hamıt Esaman,
«Egemen Qazaqstan»
Jambyl oblysy
