Alqaly jıynǵa elimizdiń jáne shet elderdiń aldyńǵy qatarly ǵalymdary men akademıkteri, halyqaralyq dárejedegi laýazymdy tulǵalar, zııaly qaýym ókilderi qatysty.
Konferensııada búkil ǵylymı qaýymdastyqtardy tolǵandyratyn ekonomıkanyń ınnovasııalyq damýyn boljaý ádisnamasy, ınnovasııalyq ekonomıkanyń áleýmettik qyrlary; aımaqtyq damý jáne ınnovasııalyq ekonomıkanyń ósý núktelerin qalyptastyrý, jahandyq basqarý jáne ulttyq ekonomıkalar qaýipsizdigi problemalary syndy ózekti máseleler keń aýqymda talqylandy. Ásirese, qalyptasqan jahandyq dúnıetanymnyń negizgi problemalary, fılosofııalyq planetarlyq oılaý tujyrymdamasy, ınstıtýsıonaldyq reformalar men azamattyq mádenıet, ulttyq biregeılik pen rýhanı-mádenı qundylyqtardyń jandanýy, qoǵamdy izgilendirýdiń tarıhı qyrlary, qazirgi zamanǵy bilim berý keńistigin izgilendirýdiń jańa tásilderi, Jibek joly gýmanıtarlyq belbeýi syndy taqyryptarǵa erekshe basymdyq berildi. «Qazirgi álem damýynyń ozyq tendensııasy jańa qoǵamdyq damý derekkózderin, ıaǵnı ınnovasııalyq damý prosessindegi adamdardyń qazirgi ekonomıkalyq, áleýmettik jáne mádenı qyzmetin uǵyný máselesi basty nazarda. Elbasy Nursultan Nazarbaevtyń Qazaqstanda qoǵamdyq sanany jańǵyrtý jónindegi mindetterin iske asyrý gýmanıstik qundylyq baǵdarlarǵa súıenetin jańa ıdeologııa qalyptastyrýdy talap etedi. Ol úshin ultjandy, quqyqtyq mádenıet deńgeıi joǵary, ómirlik ustanymy belsendi jas býyn azamattardy tárbıeleý sııaqty maqsatty is-qımyldardy júıeli túrde qolǵa alý kerek,» deıdi konferensııany uıymdastyrýshylar.
QR BǴM Ǵylym komıtetiniń tóraǵasy, Máskeý aqparattandyrý akademııasynyń akademıgi, elimizdiń joǵary mektep akademııasy men Joǵary ǵylymdar akademııasynyń akademıgi Ázimhan Satybaldın sóz alyp, mereıtoı ıesin quttyqtaı kele, ótkizilip otyrǵan sharanyń mańyzdylyǵyna toqtaldy. Ǵylymı konferensııa aıasynda 20 dan astam ǵylymı baıandama oqylyp, «Innovasııalyq ekonomıka jáne qoǵamdy izgilendirý» máselesi týrasynda aýqymdy oılar aıtyldy. Sondaı-aq, shara barysynda ǵalymnyń ǵylym jolyndaǵy tabandy eńbeginiń nátıjesin kórsetetin qazaq, orys, aǵylshyn tilderinde jaryq kórgen 25 tomdyq kitabynda qozǵalǵan taqyryptar jaıly da aıtylmaı qalǵan joq.
«Men Orazalyny balań shaǵynan bastap bilem. Bir mektepte bilim aldyq. Qazaq halqyna sińirgen eńbegi az emes. Ol jurtynyń senim údesinen shyǵyp, búgingi tańda búkil álemge áıgili ǵalym boldy. Ekonomıkadan bastaý alǵan dara jol, rýhanııatpen sabaqtasyp jatyr. Tomdyq jınaǵynyń 25-tomy Abaıǵa arnalýy da tegin emes. Bul, ǵalymnyń tektilik tamyrynyń tym tereńde jatqanyn ańǵartsa kerek. Eldiń órkenıet pen mádenıetke kirigýi men kemel bolashaǵy úshin dál osy Orazaly Sábden syndy azamattar kerek», deıdi jazýshy, Qazaqstannyń eńbek sińirgen qaıratkeri Marhabat Baıǵut.
Konferensııa sońy seksııalyq otyrysqa ulasyp, búgingi qozǵalǵan taqyryptyń jeke tarmaqtary boıynsha usynystar ortaǵa tastaldy.
Arman OKTIаBR,
«Egemen Qazaqstan»
