Máskeýdiń Plehanov atyndaǵy bıznes-ınkýbatory ınstıtýtynyń dırektory Rýslan Mamedovtiń aıtýynsha óńir jastary bızneske óte jaqyn.
«Osyndaı forýmdar ótkizý óte qajet, ári óte paıdaly. Forým maqsaty – jastarǵa óz ıdeıalaryn júzege asyryp, ony damytýǵa jáne qarjylaı qoldaý tabýǵa kómek beredi. Ýnıversıtettegi Startap Akademııada stýdenttiń bilimin jetildirýge barlyq jaǵdaı jasalǵan. Tipti, kásipkerlik bilimderi bar. Sondyqtan, forým Pavlodar men Máskeý arasyndaǵy tájirbıe sııaqty, úırener kóp», dedi Rýslan Mamedov.
Jastar forýmy bıyl «Jastar jáne bıznestiń dıalogy» formatynda ótti. Forýmǵa elimizdiń óńirlerinen, sondaı-aq, Reseı, Qytaı, Mońǵolııa, Qyrǵyz elderinen barlyǵy 200-deı delegat keldi. Osymen 7-shi ret ótip otyrǵan Halyqaralyq jastar forýmynyń negizgi maqsaty – birlik, mádenı-rýhanı jáne ıntegrasııalyq baılanystardy nyǵaıtý. Forýmdy oblys ákimdigi, Assambleıanyń jergilikti fılıaly, Jastar saıasaty máseleleri jónindegi basqarma uıymdastyrdy. Bıylǵy jylǵy forýmda jastar arasyndaǵy dıplomatııalyq, etnosaralyq baılanys jáne turaqtylyq pen kásipkerlikti damytý sııaqty máseler tóńireginde oı qozǵaldy. О́ıtkeni, qazir jastardy bıznes salasy qatty qyzyqtyrady.
Jıynǵa qatysýshylarǵa stýdentter uıymdastyryp, «Bıznes-startap jobalaryn» usyndy. Jastardyń bıznes-startap jobalary usynylǵan kórmede stýdentter men jas bıznesmender, oqýshylar ınnovasııalyq ıdeıalaryn tanystyrdy. Mektep oqýshysy Sofıa Klochkova «aqyldy rozetka» jasap shyǵardy. Qurylǵy úıde toqtan ajyratýǵa umytyp ketken quraldardy uıaly telefon arqyly qashyqtan sóndirýge múmkindik beredi.
Sonymen qatar, kórme qonaqtaryn bar-joǵy 90 sekýnd ishinde Rýbık kýbıgin jınaıtyn robot tańqaldyrdy. Bul ıdeıa avtorlary IT-HOUSE ınnovasııalyq bilim berý ortalyǵynda oqıtyn 4 synyp oqýshylary Álim Baqytjanov pen Nurdáýlet Toıjan. Al jas kásipker Álııa Qonysbaeva bolsa, Tafella degen jobasy arqyly tátti talqan, jańǵaq qosylǵan jentinen dám tattyrdy. Álııa ulttyq tátti ónimderin shetelderge aparýdy armandaıdy.
Startap jobalar baıqaýynda ýnıversıtettiń magıstranty Ál-Farabı Uzaq «KazAgroTrade startap jobasy StartUP battle baıqaýynda 1 mıllıon teńge jeńip aldy. Bul joba aýyl sharýashylyǵy salasyndaǵy taýar óndirýshilerdiń jumysyn jeńildetýge arnalǵan.
Farıda Byqaı,
«Egemen Qzqastan»
