Atalǵan semınar-praktıkýmnyń aıasynda kolledj qabyrǵasynda birqatar taǵylymdy is-sharalar uıymdastyryldy. Qonaqtar «Alash» elektrondy kitaphanasynyń jumysymen tanysyp, «Alash arystary: sońǵy sóz, sońǵy sýret» atty fotogalereıany tamashalady. Ahmet Baıtursynov bastaǵan birneshe alash qaıratkerleriniń atylar aldyndaǵy sońǵy sýretteri ilingen fotogalereıany kópshilikpen birge aralap kórgen belgili ǵalym Arap Espenbetov tolqyp, tebirene sóıledi.
«Semeıdegi alash qaıratkerlerine qatysy bar tarıhı ǵımarattar men eskertkishterdiń kópshiligin saqtaı almadyq. Abaıdyń alǵashqy mýzeıi turǵan ǵımarat joq. Muhtar Áýezov túsken ǵımarat joq. «Qaraly sulýdaǵy» keıipker, ekinshi qabattan qarap turatyn ádemi qyzdyń úıi joq. Qaladaǵy alashtyń alyptarynyń izi qalǵan, qoldarynyń taby qalǵan, Á.Marǵulan, Q.Sátbaev, J.Aımaýytov, T.Jomartbaev, B.Sársenov, Q.Nurmuhametov syndy tulǵalar bilim alǵan, qyzmet etken, buzylmaı saqtalǵan sanaýly ǵımarattyń biri – osy. Pedagogıkalyq kolledjdiń jasap jatqan jumystary jastardyń tárbıesine zor kómegin tıgizedi. «Sońǵy sóz, sońǵy sýret» fotogalereıasyna kelsek, árıne, bir qaraǵanǵa ońaı. Biraq olar sońǵy sózin aıtyp, sońǵy sýretteri túsirilgeninshe qansha azapty bastan keshirdi. «Sáken Seıfýllındi túrmede «murtyń qandaı sulý edi» dep bir-birlep julyp, «tisiń qandaı ádemi edi» dep bir-birlep qaǵyp tastap otyrǵan» dep aıtyp otyrýshy edi Qaıym ustazymyz. Sondyqtan alashty taný, alash arystaryn ardaqtaý baǵytyndaǵy jumystar toqtalmaýy tıis», - dedi ǵalym.
Sonymen qatar semınar-praktıkým aıasynda Asan Omarov, Qusmilııa Nurqasym, Turdyqul Shańbaı, Muratbek Kenemoldın syndy shahardaǵy zııaly qaýym ókilderi Astanadaǵy Eýrazııa ulttyq ýnıversıtetiniń qyzmetkeri, alashtanýshy Erlan Saılaýbaımen onlaın rejımde pikir almasyp, alash taqyrybyndaǵy oılaryn ortaǵa saldy.
Kolledj dırektory Shaǵangúl Janaeva Semeıdegi alash taqyrybyn zerttep júrgen qos ǵalym - M.Qozybaev atyndaǵy tarıh jáne saıası-áleýmettik zertteýler ǵylymı ortalyǵynyń dırektory Muhtarbek Kárimov pen «Alashtaný» ortalyǵynyń dırektory Turdyqul Shańbaıǵa «Muhtar Áýezov atyndaǵy tósbelgini» saltanatty túrde tabys etti. Shara sońynda alash qaıratkerlerine arnap quran qatym túsirilip, as berildi.
Azamat QASYM,
«Egemen Qazaqstan»
Shyǵys Qazaqstan oblysy.
