Til maıtalmandary marapattaldy

Astanadaǵy Prezıdenttik Mádenıet ortalyǵynda Qazaqstan halqy Assambleıasynyń uıymdastyrýymen Qazaqstan Respýblıkasy Táýelsizdiginiń 20 jyldyǵyna arnalǵan Qazaqstannyń etnostyq toptary arasynda elimizdegi etnosaralyq birlik pen kelisimdi nyǵaıtý, memlekettik tildiń Qazaqstan halqyn biriktirýshi faktor retindegi mártebesin arttyrý maqsatynda – «Memlekettik tildi bilý – paryzyń» atty respýblıkalyq olımpıada bolyp ótti. Atalǵan is-shara – elimizdegi etnostyq top ókilderiniń memlekettik tildi úırenýge degen yntasyn arttyrý, memlekettik tildiń meńgerilýi arqyly jastardy qoǵamdyq belsendilikke tartý, qazaqstandyq sáıkestilik pen otansúıgishtikti qalyptastyrý máselelerine oń yqpalyn tıgizýdi kózdeıdi. Bul shara buǵan deıin respýblıka boıynsha ótkizilip, elimizdegi 21 ulttyń 300-den astam ókilderi baǵyn synasa, búgingi dodada oblystar men qalalyq deńgeıde ótkizilgen baıqaýlardan iriktelgen 18 ben 30 jas aralyǵyndaǵy 16 jeńimpaz óz bilim-biliktiligin baıqatty. Shara barysynda olar «Otantaný» taqyrybynda óz oılaryn jetkizip, «Qazaq tilin bilý maǵan ne beredi?» atty esse jazsa, «Memlekettik til – is júrgizý tili» kezeńinde memlekettik tilde blank toltyryp, jýrnalıstermen qazaq tilinde baspasóz máslıhatyn ótkizip jáne «О́nerliniń órisi keń» atty taqyryp boıynsha qazaq halqynyń ónerin nasıhattady. Qatysýshylardyń bilimi men biliktiligin qoǵam qaıratkerleri, ǵalymdar men tilshiler baǵalap, júldegerlerge arnaıy syılyqtar «Ult taǵdyry» qoǵamdyq qozǵalysynyń, «Lınga» til oqytý ortalyǵy men «Meniń elim» jýrnaly atynan belgilenip, jeńimpazdar Qazaqstan halqy Assambleıasynyń atynan dıplom, alǵys hat jáne baǵaly syılyqtarmen marapattaldy. Berik SADYR.