Tań sáriden úmitterin úkilep Oqýshylar saraıyna aǵylǵan 538 qatysýshy ádilqazylar alqasynyń aldynda qazaqsha, oryssha, aǵylshynsha, qytaısha jáne ózge de tilderde de án salyp, baqtaryn synady. «Baq synady» dep aıtqanǵa jeńil bolǵanymen, tek jarqyn bolashaqtan úmit kútetin, keń aýqymdy baıqaýǵa alǵash ret qatysyp otyrǵan bala kóńil úshin bul baıqaý tolqynysqa toly mańyzdy sát ekeni aıtpasa da túsinikti. Ár buryshta daıyndyq jasap, daýysyn jattyqtyryp júrgen 7 men 13 jas aralyǵyndaǵy balalardy jetekteı jetken ata-anadan bastap, olarǵa qoldaý bildirip kelgen týǵan-týys qaýymyn qosqanda, Oqýshylar saraıy bir sátke úlken mereke alańyna aınalyp ketkendeı edi.
Dúbirli baıqaýǵa tek ońtústik shahardan ǵana emes, О́zbekstan men Qyrǵyzstannan da at arytyp jetken kishkentaı daryndar óz qabiletterin kórsetý úshin baryn-aq saldy. Álbette, ádilqazylar alqasyn aıryqsha daýsymen tánti etken talaı talanttyń bar ekeni ras. Degenmen, 9 jasar Nurlybek Saparbaı men 11 jasar Jánel Qasenova júzdiń ishinen júırik shyǵyp, qalalyq irikteý kezeńiniń qorytyndysy boıynsha jeńimpaz atandy.
«Men buryn mundaı án baıqaýlaryna qatysyp kórgen emespin, biraq jeńimpaz atanatynyma sendim», deıdi qýanyshtan júzi bal-bul janǵan Nurlybek. Al qatty tolqyp, qýanyshtan kózine jas úıirilgen Jánel: «Baıqaýǵa qatysýǵa kelgen osynshama balany kórgende jeńis maǵan buıyra qoımaıtyn shyǵar dep oıladym. Biraq bar kúshimdi jınap, irikteýdiń barlyq kezeńderinde ózimdi senimdi ustaýǵa tyrystym. Jeńiske jetkenime qatty qýanyp turmyn!», dedi.
Aıta ketsek, osymen ekinshi ret ótkizilip jatqan «Bala daýysy» án baıqaýy bıylǵy jyldyń 12 mamyrynda Pavlodar qalasynda bastalǵan bolatyn. Pavlodar jáne Shyǵys Qazaqstan oblystarynan qatysqan 347 balanyń ishinen 2 qatysýshyny iriktep alǵan shyǵarmashylyq top at basyn Almatyǵa tiregen edi. 23 maýsymǵa deıin sozylatyn irikteý kezeńi aralyǵynda bulbul daýysty bala ánshilerdi tabý maqsatynda «Bala daýysy» endi elimizdiń qalǵan oblystaryn aralap shyqpaq.
16 aımaqtan 16 jeńimpaz anyqtalǵan soń jetkinshekter Tolqyn Zabırova, Medeý Arynbaev, Mádına Sádýaqasova, Marjan Arapbaeva, Móldir Áýelbekova, Jubanysh Jeksenuly syndy tanymal tálimgerlerden, kásibı mýzykanttardan, horeograf, stılısterden mýzyka mektebinde bir aı tálim alatyn bolady. Al qazan aıynyń 27-29 juldyzy aralyǵynda «Almaty Arena» muz saraıynda KTK telearnasy arqyly tikeleı efırde ótetin «Bala daýysynyń» sýper-fınalynda kásibı qazylar alqasy men sms-daýys berý arqyly telekórermender júregin jaýlaı bilgen has talant parıjdik Dısneılendke tegin qydyryp qaıtý joldamasyna jáne Qazaqstandaǵy eń úzdik mýzykalyq oqý oryndarynyń biriniń grantyna ıe bolmaq.
Mıra BAIBEK,
«Egemen Qazaqstan»
ALMATY
