Tilin býǵan basqarma

Osy kúni adam ómirin ǵalamtorsyz elestetý múmkin emes. Jasy da, kárisi de ınternetke «mataýly». Munyń zııany da, paıdasy da bar. Zııa­nyn aıtyp, zar ılep qaıtemiz. Paıdasyna toqtalaıyq. Qazir atyńdy shyǵaryp, jurtqa tanylýdyń tóte joly – áleýmettik jelide belsendi bolý. Tek sol joldy durys paıdalana bilý qajet. Iаǵnı, jeke bastyń emes, qoǵamnyń múddesine baǵyttasaq bolǵany. Máselen, jarys dese, delebesi qozyp, barǵan básekesinen qorjynyn júldege qampaıtyp qaıtatyn sportshy qaýymnyń jetistigin nege nasıhattamaımyz? Qazirginiń chempıony – burynǵynyń batyry. Endeshe, kópshilik qaharmanyn bilýi kerek qoı. О́kinishke qaraı, bizdiń oblysta osy jaǵy kemshin. 
Jeke federasııalar men qaýymdas­tyqtardyń jumysyn sóz etpeı-aq qoıalyq. О́ńir sportynyń eki tizgin, bir shylbyryn ustap otyrǵan oblystyq dene tárbıesi jáne sport basqarmasyn mysalǵa alsaq jetkilikti. Sonymen, bul basqarma ınternetti qanshalyqty durys paıdalanýda? Áleýmettik jelide belsendi me? 
Basqarmanyń resmı saıtyna (http://oblsport-pavlodar.gov.kz/ru/) kirdik. Jańalyqtar bólimi sońǵy ret 5 naý­ryzda jańartylǵan. Osy aralyqta bizdiń sportshylar ne jarysqa qatyspaǵan, ne barǵan jerinen sympıyp bos qaıtqan. Mekemeniń resmı saıtyna kirgen adam osyndaı oı túıedi. Jaraıdy, bul resmı saıt delik. Aqparatty tańdap salady. Negizgilerine nazar aýdarady. Biraq, óńir sportshylarynyń jetistigin jalpaq jurtqa jarııalap, jar salýdyń basqa da joldary bar emes pe..?
Jerlesterimizdiń jetistigin alǵash bolyp estıtin osy basqarmanyń mamandary. Endeshe, sol bir súıinshi habardy kópshilikpen bólisip otyrý úshin nelikten áleýmettik jelilerden memlekettik mekemeniń resmı paraqsha­syn ashyp qoımasqa? Sóz joq, jelige «jabysqandardyń» deni sol paraqshaǵa eshbir jarnamasyz-aq jazylar edi. Sebebi, sport – bárine ortaq. Bul salany túsiný jáne ońaı. Sondaı-aq, qysqa-qysqa sport habarlaryn jurtshylyq tez qabyldaıdy. О́kinishke qaraı, oblystyq dene tárbıesi jáne sport basqarmasynyń áleýmettik jelilerden birde-bir paraqshasyn kór­medik. Máselen, Aqtóbe jáne Oń­tús­tik Qazaqstan oblystary basqar­malarynyń «Feısbýk» jelisinde óz paraqshalary bar. Sportshylarynyń jetistigin sol jerge jarııalap otyrady. Basqarmaǵa da, jarystan oljaly oralǵan oǵlanǵa da jarnama, nasıhat emes pe?!
Negizi bar ǵoı, bir óńirge bir sport saıty kerek. Bul – búgingi kúnniń talaby. Gazet-jýrnal shyǵarýmen salys­tyrǵanda, saıtty júrgizý áldeqaıda ońaı ári shyǵynsyz. Onyń ústine oqyrmany da kóp. Osyny eskerdi me eken, Mańǵystaý (http://aktausport.kz/) jáne Shyǵys Qazaqstan oblystary (http://vksport.kz/) ózderiniń jeke sport saıttaryn ashty. Jap-jaqsy jumys istep tur. Bizge de osyndaı bir saıt qajet. Osyny oblystyq dene tárbıesi jáne sport basqarmasy qolǵa alsa, saıt jumysyn dóńgeletip áketetin mamandar tabylady. Biraq, qaıdam. Bul basqarma – bizdiń óńirde baspasóz hatshysyn ustamaıtyn memlekettik mekemeniń biri. Basqarmanyń ınternet jelisindegi jumysynyń aqsap jatqany da sondyqtan bolar...
О́zge salalar sekildi emes, sport jarııalylyqty súıedi. Chempıondardy nasıhattaýmen óńirdiń ımıdji qalyptasady. Osyny túsinsek eken. 

Farhat ÁMIRENOV,
jýrnalıst

PAVLODAR