«Jas Otan» JQ tóraǵasy atap ótkendeı, ınnovasııa – ekonomıkalyq jáne áleýmettik damýdyń negizgi qozǵaýshy kúshi. Osy oraıda jastardyń róli aıryqsha atalyp, ǵylymı-ınnovasııalyq qyzmetke baýlý arqyly olardyń shyǵarmashylyq qabiletin arttyrý maqsatynda baıqaý ótkiziledi.
Baıqaý bes atalym boıynsha ótkiziledi: Áleýmettik mańyzdy ınnovasııalar, Tehnostart, Úzdik jas ǵalym, Jastardyń ınnovasııalyq jobasy, Perspektıva. Sonymen qatar, baǵyttardyń keń spektri qamtylady: qazaq tiliniń latyn álipbıine kóshýi, jasyl energetıka (energetıka jáne energııany únemdeý), hımııalyq tehnologııa, nanotehnologııa jáne bıotehnologııa, ónerkásiptik jáne qurylystyq tehnologııa men óndiris, agroınnovasııa (ónerkásiptik tehnologııa jáne óndiris), IT tehnologııa men avıaǵarysh tehnologııasy, medısına, medısınalyq tehnıka jáne tehnologııa, farmasııa, tabıǵatty tıimdi paıdalaný, resýrsty únemdeý, robottytehnıka, jol qozǵalysynyń qaýipsizdigi, úzdik laıfhak, 3D baspa jáne jańa materıaldar, gadjetterge arnalǵan mobıldik qosymshalar, ekologııalyq ınnovasııa, nanoımpýls – nanotehnologııadaǵy ınnovasııa, bilimdegi ınnovasııa.
Konkýrstyq ótinimderdi ádil baǵalaý maqsatynda qazylar alqasyna ǵalymdar, ulttyq kompanııalar, konstrýktorlyq bıýrolar, sondaı-aq, mınıstrlikter ókilderi qatarynan sarapshylar shaqyrylatyn bolady.
Baıqaýǵa qatysý ótinimderi 30 qyrkúıekke deıin qabyldanady.
Baıqaýdyń jalpy júlde qory – 8 000 000 teńge. Baıqaýǵa qatysýshylar men jeńimpazdar jobany ınvestısııalaý men qarjylandyrý kózderin tabý múmkindigine ıe bolatynyn atap ótý kerek.
Baspasóz máslıhaty barysynda «Úzdik jas ǵalym», «Jastardyń ınnovasııalyq jobasy» atalymdary boıynsha 2016 jylǵy baıqaý júldegerleri Álııa Áljanova men Muhtar Muqashev óz zertteýlerine baıqaýdyń tıgizgen áseri men bir jyl ishinde jetken jetistikteri týraly aıtyp berdi.
«Egemen-aqparat»
