О́tken ǵasyrdyń basynda erkin el bolýǵa talpynǵan, sol jolda basyn bergen qazaq zııalylary qurǵan úkimettiń ǵasyrlyq toıy ár-ár jerde túrli deńgeıde, túrli formatta atalyp jatyr.
Taldyqorǵan ortalyq ıppodromynda báıge ótti. Alashordanyń 100 jyldyǵyna arnalǵan dúbir. Aldymen qunan báıge. 15 shyqyrymdyq qashyqtyqty shaldyqpaı alǵan bolashaq tulparlardyń kóshin Baýyrjan Álimjanov úkilep qosqan Zymyran atty qunan bastap keldi. Ekinshi oryn – Dııas Seısebaevtyń Bonýsyna, úshinshi júlde – Baqtory laqap atyn ıemdengen (ıesi Baıahmetov Qunarǵalı) júırikke buıyrdy.
Báıgeniń basty bási de, negizgi kórki de – alaman. 30 shaqty at júgirtken alamanda Erbol Sádýaqasovtyń Sultan atty tulpary jeke dara keldi. Aıdar Temirǵalıevtyń Shı qasqasy – 2 oryn, Ádil Keńestiń Erkemaıy – úshinshi júldeni ıemdendi.
Báıgeniń eki túrinen on júlde báske tústi. Sonymen qatar, Alashordanyń 100 jyldyǵy kýbogy. Toıǵa Jaqsylyq Úshkempirov, Ermahan Ibraımov bastaǵan sport sańlaqtary at salysyp, birqatar qazaq estradasynyń ókilderi óner kórsetti. At jarystan soń Alash arystarynyń rýhyna arnalǵan as berildi. Báıgeni uıymdastyrýshy taldyqorǵandyq kásipker, ulttyq at sporty túrlerine kóńil bólip júrgen kásipker, Aýǵan soǵysynyń ardageri Baýyrjan Barlybaev aıtýynsha «Ultyna janashyr jandardyń demeýshi bolýymen» ótip jatqan as pen báıge ıdeıasy jyl basynan beri oılastyrylǵan. At qosýshylar eshqandaı jarna tólemeıdi.
Almas NÚSIP,
«Egemen Qazaqstan»
Almaty oblysy
