Sonda Elbasy «Qazaqtyń qaı jeri de qazaqtiki. Myna turǵan burynǵy Narynqol aýdany shekaraǵa taıaý, kóp jeri bosap qaldy. Tabıǵaty ǵajap. Soltústiktiń kóp aýdandarynda tarıhı otanyna kóshken halyqtardyń esebinen adam sany azaıdy. Otanyna oralǵysy kelgen aǵaıyndardy eń aldymen osy óńirlerge qonystandyrýǵa yqpal etý kerek», degen bolatyn.
Rasynda, qazaqtyń qaı óńiriniń de alash balasyna bótendigi joq. О́z jeri, óleń tósegi. Al ońtústiktiń kóptegen aýdandarynda adam sany kóbeıip, shaǵyn bolsa da jer alyp, kásipkerlikpen aınalysý qıyndap ketti. Sondyqtan, jumyssyzdyq máselesi ýshyǵyp barady. Ońtústiktiń qazaǵyn soltústikke kóshirý ıdeıasyn qoldaǵan azamattardyń biri oblystyq máslıhattyń depýtaty Jańabaı Aǵabekov eki-úsh jyldan beri osy máselemen túbegeıli aınalysyp júr. О́z qaltasynan qarjy shyǵaryp, júzdegen otbasyny Soltústik Qazaqstan oblysynyń aýdandaryna aparyp qaıtty. Ondaǵy bılik basyndaǵy azamattarmen kezdesip, jaǵdaıdy tarazylap júr.
Jaqynda eki avtobýspen jolǵa shyqqan kóshtiń alǵashqy tobyn «Nur Otan» partııasy oblystyq fılıaly tóraǵasynyń birinshi orynbasary Álimjan Qurtaev pen oblys ákiminiń orynbasary Erbol Sadyr bastaǵan jergilikti bılik ókilderi shyǵaryp saldy.
– Buǵan deıin qonys aýdarǵan azamattardyń 70 paıyzy jumyspen qamtyldy. Olar óz mamandyqtary boıynsha jumysqa ornalasýmen qatar, aýyl sharýashylyǵy salasynda mal, egin sharýashylyǵymen aınalysýǵa 7 myń gektardan astam jer alyp, birneshe aýyl kooperatıvterin quryp, jeke kásipkerlik ashyp, isterin dóńgeletip otyr. Sondyqtan, saparlaryńyz sátti bolyp, soltústiktiń eline el bolyp qosylýlaryńyzǵa tilektespiz, – dedi oblys ákiminiń orynbasary Erbol Sadyr shyǵaryp salý rásiminde.
Ońtústik Qazaqstan turǵyndaryn elimizdiń jumys kózi kóp aımaqtaryna qonys aýdarý sharasy aıasynda atalǵan otbasylar soltústiktiń Aıyrtaý, Aqjar, Jumabaev, Esil jáne Ýálıhanov aýdandaryna baryp qonystanbaq.
Bıyl qonys aýdarǵan otbasynyń ár múshesine 35 aılyq eseptik kórsetkish kóleminde, ıaǵnı shamamen 80 myń teńge bir rettik kómek beriledi. Sonymen qatar, bir jylǵa deıin turatyn úıdiń jaldaý aqysy men kommýnaldyq tólemderi óteletin bolady.
Árıne, buryn jyly jaqta turǵan halyqtyń soltústiktiń qataldaý aýa raıyna birden kóndigip ketýi qıyndaý soǵady. Sondyqtan, alǵashqy kezeńde olarǵa sińicip ketý úshin janashyrlyq, qoldaý kerek. Osy ıgi iske muryndyq bolyp júrgen oblystyq máslıhattyń depýtaty Jańabaı Aǵabekov qonys aýdarýshylar birden sharýashylyqpen aınalysýy úshin ár otbasyna 130-150 myń teńge kóleminde kókónis daqyldarynyń tuqymyn alyp berýge ýáde etti. Bul – súısinerlik, úlgi alatyn jaıt.
Sáýir aıynda ońtústikke soltústikten arnaıy kelgen jumys berýshiler bos jumys oryndaryna jármeńke ótkizgen bolatyn. Ázirge, myńǵa tarta otbasy qonys aýdarýǵa nıetterin bildirdi.
Qazaq mundaıda «Kósh kólikti bolsyn!» degen aq tilek aıtady.
Baqtııar TAIJAN,
«Egemen Qazaqstan»
Ońtústik Qazaqstan oblysy
