– Aýa raıy qarasyp tur. Qazirdiń ózinde ylǵal jabý jumysyn jospardaǵy 305 myń gektardyń ornyna 310,8 myń ga etip artyǵymen oryndadyq. 85,2 paıyz alqapqa sebý aldyndaǵy óńdeý jumystary júrgizildi. Búginge deıin kóktemgi jer jyrtý kózdelgen 9 myń ga alqaptyń 7,6 myń gektary jyrtyldy, – deıdi Batys Qazaqstan oblystyq aýyl sharýashylyǵy basqarmasynyń egin sharýashylyǵy bólimi bastyǵynyń mindetin atqarýshy Asylbolat Kýbıev.
Búginde oblystyń egisti aýdandarynda kóktemgi dala jumystary jappaı júrgizilip jatyr. Jospar boıynsha 52,0 myń ga alqapqa maıly daqyldar egilmek, onyń 40 myń ga alqaby – kúnbaǵys. Kartop jáne kókónis-baqsha daqyldaryn 9,0 myń ga alqapqa otyrǵyzý kózdelgen. Al mal azyqtyq daqyldar 168 myń ga alqapty quraıdy.
Mamandardyń aıtýynsha, sharýashylyqtar tuqymmen tolyqtaı qamtylǵan. Jazdyq dándi daqyldar tuqymy jospardaǵydan 25 paıyzǵa artyq daıyndalypty. Iаǵnı, qajettilik 19,8 myń tonna bolsa, naqty daıyndalǵany – 24,8 myń tonna.
Kóktemgi dala jumystaryna 4 173 traktor, 4 965 tuqymsepkish, 793 qopsytqysh jáne 46 egý kesheni qatysýda.
Batys Qazaqstan oblysyna bıylǵy kóktemgi dala jumystaryn júrgizý úshin 12 myń tonna dızel otyny bólingen eken. Ony jetkizýshi operator – «QazMunaıGaz ónimderi» JShS. 1 lıtr dızel otynynyń baǵasy 122 teńgeden jiberilgen. Kóktemgi egis jumystaryn qarjylandyrýǵa «Keń dala» baǵdarlamasy arqyly 600 mln teńge qarastyrylǵan qarjy «Agrarlyq nesıe korporasııasy» AQ BQO fılıalynyń aýdandyq nesıe seriktestikteri arqyly beriledi.
Qazbek QUTTYMURATULY,
«Egemen Qazaqstan»
ORAL
