Jalpy, «Islamıada» degen beıresmı ataýǵa ıe bolǵan bul jarys alǵash ret 2005 jyly Saýd Arabııasynda ótken bolatyn. Sol joly Qazaqstan sportshylary tamasha nátıjege qol jetkizip, 27 júldemen (13 altyn, 8 kúmis jáne 6 qola) jalpykomandalyq esepte úshinshi orynǵa ıe boldy.
Ekinshi Islam oıyndary 2009 jyly Iran elinde ótýge tıis-tin. Alaıda, bul memleket pen Arab elderi arasyndaǵy dúrdarazdyqtyń saldarynan atalǵan doda ótpeı qaldy. Sóıtip, arada segiz jyl ótkende, ıaǵnı 2013 jyly Islamıadany Indonezııa qabyldady.
Al baýyrlas Ázerbaıjan elinde ótken dúbirli dodaǵa Qazaqstannan el namysyn arqalap 32 sportshy attanǵan bolatyn. Bizdiń saıypqyrandar sporttyń bes túrinen, atap aıtqanda boks, dzıýdo, taekvondo WTF, erkin jáne qyzdar kúresi boıynsha synǵa tústi.
Obaly neshik, qyz-jigitterimiz shama-sharqynsha óner kórsetip, namysty qoldan bermeýge tyrysty. Biraq, ózge elderdiń bul jarysqa joǵary mán berip, tas-túıin daıyndyqpen kelgeni baıqaldy. Biz bolsaq, bul jolǵy Islamıadaǵa áıteýir qatysý kerek bolǵan soń, bara salǵan sııaqty kórindik. О́ıtkeni, jarystyń qorytyndy nátıjesine kóz jibergende osylaı demeske amal qalmady. Qazaq eliniń sportshylary bárin qosyp sanaǵanda 19 júldege ıe boldy. Bar-joǵy eki altyn... bes kúmis jáne 12 qola medal. Eger de, qos boksshymyz – Azat Mahmetov (52 kg) pen Tursynbaı Qulahmet (75 kg) bolmasa, altynnan jurdaı bolady ekenbiz. Sóıtip, jalpy esepte 14-orynnan kórindik.
«Islamıada-2017» dodasynda birinshi oryndy oıyndar ıesi Ázerbaıjan aldy. Olardyń enshisinde 152 medal (74 altyn, 46 kúmis, 32 qola). Odan keıingi oryndardy Túrkııa (185 medal – 68, 63, 54) jáne Iran (89 medal – 30, 26, 33) ıelendi. Al bizdiń kórshimiz О́zbekstan bolsa, 62 medalmen (15 altyn, 17 kúmis jáne 30 qola) tórtinshi orynǵa taban tiredi...
Degenmen, nege bulaı dep oıbaı-attan salýdan abaı bolǵan jón. Máseleniń mánisi – tereńde. Onyń bir kiltıpany mynada: Halyqaralyq Olımpıada komıteti, Olımpııalyq hartııa dinı turǵydaǵy qandaı da bir jarysqa asa saqtyqpen qaraıdy, tipti boıyn aýlaq salýǵa tyrysady deýge de bolady. Sol sebepti, biz de zaıyrly memleket esebinde osy jaıtty eskergen sııaqtymyz... Myń qubylǵan dúnıeni ýysynda ustaǵan saıasatpen sanaspasqa taǵy bolmaıdy.
Qaırat ABDOLLA
