Ǵasyr kóshinen qalmaı, terezesi teń dárejede damyǵan eldiń turmysy jaqsy, ómiri baqýatty bolatynyn kórip te, estip te júrmiz. Bizdiń osyǵan deıin de talmaı aıtyp, jurtshylyq kókeıine sińirip kele jatqan «básekege qabilettilik» týraly ustanymdarymyz Prezıdentimizdiń jańa eńbeginde ómirlik qaǵıda, negizgi tuǵyrnama deńgeıinde baǵalanýy tegin emes. Iаǵnı, tek materıaldyq ónim shamasy ǵana emes, «bilim, qyzmet, zııatkerlik ónim nemese sapaly eńbek resýrstary», adamdardyń básekelik qabiletimen aıqyndalatyny talassyz shyndyq. Álbette, táýelsizdikke qol jetkizgen shırek ǵasyr bederinde buǵan qajetti alǵysharttar jasaldy. Buǵan deıin túzilgen «Sıfrly Qazaqstan», «Úsh tilde bilim berý», «Mádenı jáne konfessııaaralyq kelisim» sııaqty baǵdarlamalar – ultymyzdy, ıaǵnı barsha qazaqstandyqtardy HHI ǵasyrdyń talaptaryna daıarlaýdyń qamy.
Elbasynyń maqalasyn oqyp otyryp, aqyl-oı eńbegi adamdaryna aıqyn nusqalǵan: «...bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis», degen qaǵıda erekshe nazar aýdararlyq. Bul saıası jáne ekonomıkalyq jańǵyrýlardyń ózegi bolyp tabylatyn rýhanı jańǵyrý, qanymyzǵa sińgen daǵdylar men qaǵıdalardy ózgerte otyryp, tolyqqandy betburys jasaý degen sóz. Jastarymyz orynsyz sán-saltanatshyl emes, ustamdy, qanaǵatshyl, qarapaıym, únemshil bolyp ósse, el erteńniń laıyqty izbasarlary bolyp qalyptasary anyq. Kóregen ustaz naqty maqsatqa jetý jolynda, sapaly bilim berýge, salamatty ómir saltyn ózi ustanyp, kásibı turǵydan jetilip otyrsa, ishki múmkindigin tıimdi paıdalana bilse, minez-qulyq pragmatızmi degen osy.
«Ulttyq jańǵyrý degen uǵymnyń ózi ulttyq sananyń kemeldenýin bildiredi», deıdi Elbasymyz. Ol úshin ulttyq sana-sezimniń kókjıegin keńeıte jáne ulttyq bolmystyń ózegin saqtaı otyryp, salt-dástúrlerimizdi, tilimiz ben mýzykamyzdy, ádebıetimizdi, bir sózben aıtqanda, ulttyq rýhymyzdy boıymyzda máńgi saqtaýǵa tıis. Abaıdyń danalyǵy, Áýezovtiń ǵulamalyǵy, Jambyldyń jyrlary men Qurmanǵazynyń kúıleri, ǵasyrlar qoınaýynan jetken babalar úni – bular bizdiń rýhanı mádenıetimizdiń bıik shoqtyǵy ekenin búgingi jas urpaq bilip óskeni jón.
Zarqyn TAIShYBAI,
M.Qozybaev atyndaǵy SQMÝ-diń professory, Qazaqstannyń eńbek sińirgen qaıratkeri
Soltústik Qazaqstan oblysy
