«Qaraózek» kompressorlyq stansasy Aqtóbe oblysynda jýyrda ǵana iske qosylǵan «Bozoı» stansasymen qatarlas jumys istep, «Beıneý-Bozoı-Shymkent» magıstraldy gaz qubyrynyń ótkizý qabilettiligin 15 mlrd tekshe metrge deıin ulǵaıtýǵa múmkindik beredi.
Eki stansa da sońǵy úlgidegi, joǵary tehnologııalar negizinde salynǵan jáne kúrdeli rejim jaǵdaıynda da úzdiksiz paıdalanýǵa arnalǵan gaz aıdaýshy agregattarmen jáne qosalqy jabdyqtarmen jasaqtalǵan. Aıta keterligi, qurylystyń kúrdeliligine qaramastan, «QazTransGaz» AQ osy ınvestısııalyq jobany josparlanǵan merziminen jarty jylǵa erte aıaqtap otyr.
Kompanııa ókilderiniń pikirinshe, qurylysty merziminen buryn aıaqtaýǵa, «Qaraózek» KS salý kezinde ishki rezervtegi gaz aıdaý qondyrǵylaryn ońtaıly paıdalaný arqyly qol jetkizilgen. Bul 10 mlrd teńge únemdeýge múmkindik berdi.
Tranzıttik áleýetti ulǵaıtýdan bólek, «Qaraózek» kompressorlyq stansasy taǵy bir mańyzdy mindetti sheshýge arnalǵan. Onyń qurylysy Qazaqstannyń elordasy Astanany tabıǵı gazben jabdyqtaý, sondaı-aq, eldiń ortalyq jáne soltústik óńirlerin kógildir otynmen qamtamasyz etý esebimen salyndy.
Gaz mamandaryn qurylys jobasynyń sátti aıaqtalýymen quttyqtaǵan «QazMunaıGaz» UK» AQ vıse-prezıdenti Qaırat Sháripbaev, irgeli qurylys jobalarynyń búkil eldiń gaz tasymaly salasy úshin strategııalyq mańyzy bar ekenin atap ótti. «Búgingi kúni TMD elderiniń aýmaǵynda «Bozoı» jáne «Qaraózek» kompressorlyq stansalarymen teń keletin ınfraqurylymdyq nysan joq dese de bolady. Bul gaz tasymaly salasynyń áleýetin arttyrýmen qatar, Elbasy Nursultan Nazarbaevtyń 2018 jylǵa deıin qazaqstandyq naryqtyń qajettiligin tolyqtaı otandyq gazben qamtamasyz etý jónindegi mindettemesin sheshýdegi taǵy bir mańyzdy qadam», degen pikirin bildirdi.
Ertileý ShAHMURATULY
