Qadir túni elorda meshitteri jamaǵatqa toldy

Otyz kún oraza ustaǵan álemdegi barsha musylmandarǵa Qadir túnin qarsy alý erekshe qasıetti. Elimizdiń árbir óńirindegi meshitterde aqsham ýaqytynan tań namazyna deıin ımandylyq jaıly ýaǵyzdar aıtylyp, namaz oqyldy. Elorda meshitterinde de qala turǵyndary men qonaqtary kóptep jınalyp, Qadir túnin erekshe yjdahattylyqpen qarsy aldy. Qazaqstan musylmandary dinı basqarma­synyń tóraǵasy, Bas múftı Ábsattar qajy Derbisáli Qadir túniniń ǵıbadattaryn «Nur Astana» Ortalyq meshitinde jamaǵatpen birge atqardy. Astanalyqtar men qala qonaq­ta­ry Bas múftıdiń aýzynan ýaǵyz estip, eli­miz­diń zııaly qaýym ókilderi Islam dini týraly áńgimelerdi erekshe yqylaspen tyńdady. Ramazan aıynyń kúndizi de, túni de qasıetti bolyp esepteledi. Ásirese, sońǵy on kúni erekshe baǵalanady. О́ıtkeni, sońǵy onkún­dik­te adam balasynyń birjyldyq taǵdyry belgilenetin erekshe tún – Qadir túni bar. Osy túnde Alla Taǵala Qasıetti Quran Ká­rimdi túsirgen. Qadir túni Alla Taǵalanyń razylyǵy úshin jasalǵan árbir halal is qulshylyq bo­lyp esepteledi. «Nur Astana» Ortalyq me­shitiniń naıb-ımamy Tólebı Ospan Qasıetti túndi Alla Taǵalaǵa qulshylyq jasaý, namaz, Quran oqý, sharıǵat úırený, úıretý, ýaǵyz aıtý jáne tyńdaý, tásbi tartý, dinı kitaptar oqý, dinı fılmder kórý, meshitke kelgende dúnıe sózin sóılemeý amaldaryn oryndaý arqyly zııarat etip ótkizý kerek degendi erekshe aıta ketti. Kim Ramazan aıynyń orazasyn shyn ıman jáne yqylaspen ustasa ári Qadir túnin shyn ıman jáne saýap úmitimen ótkizse onyń buryn istelgen kúnálary keshiriledi delinedi. Qadir túninde Jábreıil men búkil perishteler jer betine túsedi. Allanyń elshisi (s.ǵ.s): «Shyn máninde, Qadir túni jer betinde, pe­rish­teler usaq tastardan da kóp bo­lady», – degen eken. Mine, osyndaı ulaǵatty ýaǵyzdar aıtylǵan túnnen keıin «Nur Astana» meshitinde tańerteńgisin jınalǵan jama­ǵatqa sáresi berildi. Astanadaǵy Sadýaqas qajy Ǵylmanı meshitine de kelýshilerdiń qatary mol boldy. Taraýıh namazy oqylǵannan keıin jınalǵan jamaǵatqa «Qadir túniniń qasıeti» týraly ýaǵyzdar aıtyldy. Sondyqtan da osy túndi Allanyń pendelerge sheksiz raqym jaýdyr­ǵan túni dep esepteıdi. Oraza ustaýshylar aýyzdaryn ashqannan keıin tozaqtyń qaqpasy qulyptalady. Qadir túninde Jaratqanǵa qul­shylyq jasaǵan pendege 84 jyl namaz oqyǵan musylman adamnyń saýabymen para-par saýap jazylady eken. Alla Taǵala osy túni tilegen tilekterdi qabyl etip, jasaǵan kúnálarymyzdy keshiredi. Meshittiń naıb ımamy Sábıt Erejepov Qadir túniniń jumaǵa sáıkes kelýin erekshe jaqsylyqqa joryp otyrǵandyǵymen bólisti. Qaltaly azamat­tar­dyń qoldaýymen meshit oraza aıynda kún saıyn 100 adamǵa aýyzashar berip kelgen. Bul joly meshit aýlasynda 500 adam aýyz ashsa, tańerteńgi sáresi de berilgendigin aıta ketsek deımiz. Qadir túninde Aqtóbe, Almaty, Túrki­s­tan qalalary meshitterindegi ǵıbadat rásim­deri telearnalardan tikeleı efır arqyly kór­setildi. Osylaısha Ramazan aıy 29 tamyz kú­ni aıaqtalyp, búgin úsh kúndik Oraza aıt merekesi bastaldy. Asqar TURAPBAIULY.