Sportqa jumsalǵan qarjy qaıtarymdy

Deniń saý, tula boıyń sergek júrýi úshin sporttyń paıdasy zor. Men ózim bala jasymnan sportty súıip óstim. Besinshi synyptan bastap balalar men jasóspirimder sport mektebine baryp, voleıbolmen aınalystym. Talaı jarystarǵa da qatystym. Myqty sportshy bolý úshin talmaı ter tógý kerek ekenin jastaıymnan uǵyndym. Sondyqtan kásipker retinde sportqa qamqorlyq jasap, dástúr retinde halyqtyń salamatty ómir saltyn ustanǵanyn qalaımyn. Osy múmkindikti paıdalana otyryp, «Dın Inter» JShS-niń quryltaıshysy retinde olımpııalyq rezervi sport keshenin salyp bergenimdi aıtqym keledi. Onyń jobalyq quny 200 mıllıon teńgege tústi. Jalpy aýmaǵy 1,5 myń sharshy metr sport kesheninde voleıbol, fýtbol, basketbol, úlken jáne ústel tennısteri, kúres, karate jáne basqa sport túrlerimen shuǵyldanýǵa bolady. Kelýshiler basseınge túsip, sýǵa júzýmen aınalysady. Ár túrli trenajerlar ornatylǵan zaldarda kim qandaı sportpen aınalysamyn dese de jaqsy jaǵdaı bar. Sport keshenin ashý arqyly 20 adam jumyspen qamtyldy. Qazir sport keshenine kúnine 200-den astam adam kelip, jattyǵady, denesin shynyqtyrady. Munda kirý aqysy da basqa sport zaldarǵa qaraǵanda anaǵurlym tómen. Bul – osy shaǵyn aýdan turǵyndaryna qyzmet kórsetetin osy zamanǵy jabdyqtalǵan birden-bir sport kesheni. Sondyqtan turǵyndarǵa yńǵaıly ári baǵasy qoljetimdi. Bıyl oblysta tuńǵysh ret jaǵajaı voleıboly alańyn paıdalanýǵa berdim. Jaǵajaı voleıboly alańyn qorshap, qum tósep, eýrostandartqa saı jabdyqtadym. Alań qurylysy 1,5 aıda aıaqtaldy. Alań paıdalanýǵa berilgen azǵana ýaqytta jaǵajaı voleıbolynan eki jarys uıymdastyrýǵa muryndyq boldyq. Jarystardy jarnamalaýǵa ǵana 200 myń teńge bóldik. Sonyń nátıjesinde aqtóbelikter úshin jańa sport túri jaǵajaı voleıbolynan alǵashqy qalalyq týrnırge 15 komanda qatyssa, oblystyq jarysta 30 komanda synǵa tústi. Bul jarysqa alystaǵy Baıǵanın, Hromtaý aýdandarynan da voleıbolshylar qatysyp, kúshterin synady. Shynyn aıtqanda, bıyl tuńǵysh ret ótkizilip otyrǵanyna qaramastan osynshama komanda qatysýy jaǵajaı voleıbolynyń bolashaqta tym táýir damyp ketetinine sendiredi. Jeńimpazdar men júldegerlerge baǵaly syılyqtar usynyldy. Bul bizdiń óńirde jaǵajaı voleıbolynan tuńǵysh ótkizilgen jarys. Bul týrnırdi alda dástúrli túrde uıymdas­tyrmaq oıymyz bar. Bizdiń oblysta voleıbol sporty kenje qalyp keledi. Jaǵajaı voleıbolyn damytý arqyly sporttyń osy túrine degen jastardyń qyzyǵýshylyǵyn týdyrmaqpyz. Sportshylarǵa demeýshilik jasaý da qajetti is. Bıznes tarapynan bolatyn osyndaı bastamalar buqaralyq sportty damytýǵa serpin beredi dep oılaımyn. Ǵalymjan ELEÝOV, «Dın Inter» JShS-niń quryltaıshysy, otashy dáriger. Aqtóbe oblysy.